Dünya Azərbaycanlıları Mədəniyyət Mərkəzinin (DAMM) təşkilatçılığı ilə Rusiyanın Sankt-Peterburq şəhərində ulu öndər Heydər Əliyevin anadan olmasının 91-ci ildönümü və Heydər Əliyev Fondunun 10 illiyi münasibətilə keçirilən silsilə tədbirlərə start verilmişdir. SİA-nın verdiyi məlumata görə, Azərbaycan Ağsaqqallar Şurasının sədri, millət vəkili Fəttah Heydərovun rəhbərlik etdiyi nümayəndə heyəti günün birinci yarısında Sankt-Peterburq şəhərindəki Nizami Gəncəvi parkında olmuşlar.

Tədbirdən öncə isə nümayəndə heyətinin üzvləri, yerli hakimiyyət strukturlarının nümayəndələri və digər qonaqlar ulu öndər Heydər Əliyevin ali təhsil aldığı məktəbi ziyarət etmiş, girişdə dahi lider Heydər Əliyevin barelyefi qarşısına tər çiçəklər düzmüşlər. Nümayəndə heyətinin üzvləri ümummilli lider Heydər Əliyevin həyat və fəaliyyəti barəsində tədbir iştirakçılarına geniş məlumat vermişlər.

Dünən Sankt-Peterburq Dövlət Filarmoniyasında ulu öndər Heydər Əliyevin anadan olmasının 91-ci ildönümünə və Heydər Əliyev Fondunun 10 illiyinə həsr olunmuş təntənəli mərasim keçirilmişdir.

Azərbaycan Respublikasının Rusiya Federasiyasındakı fövqəladə və səlahiyətli səfiri Polad Bülbüloğlu çıxış edərək ulu öndərimizin həyatından, siyasi fəaliyyətindən, Rusiya ilə bilavasitə bağlı gördüyü işlərdən, iki ölkə xalqları arasında sağlam mühitin, ikitərəfli əlaqələrin genişlənməsinə verdiyi töhfələrdən danışmışdır.

Sonra Sankt-Peterburq Şəhər Administrasiyası rəhbərinin müavini Sergey Makarov çıxış edərək Heydər Əliyevin nəinki Azərbaycan, eyni zamanda bütün postsovet məkanında yaşayan xalqların çox böyük dəyər verdiyi bir lider olduğunu xüsusi vurğulamışdır. S.Makarov Heydər Əliyevin məhz Sankt-Peterburqda ali təhsil almasından qürur hissi keçirdiyini bildirmişdir.

Azərbaycan nümayəndə heyətinin rəhbəri, Azərbaycan Ağsaqqallar Şurasının sədri, Milli Məclisin deputatı Fəttah Heydərov da çıxışında mərasim iştirakçılarına ulu öndərimizin uğurlarla dolu həyatından, dünya siyasətinin zirvəsinə yüksələn ömür yolundan söz açmışdır.

Dünya Azərbaycanlıları Mədəniyyət Mərkəzinin I vitse-prezidenti Rasim Məmmədov, Milli Məclisin deputatı Jalə Əliyeva və digərləri çıxışlarında Heydər Əliyevlə bağlı təəssüratlarını tədbir iştirakçıları ilə bölüşmüşlər.

Tədbirlərdə iştirak edən Azərbaycan nümayəndə heyətinə Yeni Azərbaycan Partiyası Siyasi Şurasının üzvü, Milli Məclisin deputatı Aydın Mirzəzadə, “Xalq qəzeti”nin baş redaktoru Həsən Həsənov, “Səs” qəzetinin baş redaktoru Bəhruz Quliyev, “Yeni Azərbaycan” qəzetinin baş redaktoru Hikmət Babaoğlu və s. daxildirlər. Tədbirə həmçinin Azərbaycanın Sankt-Peterburqdakı Baş Konsulluğunun, Rusiya Federasiyasındakı xarici ölkələrin diplomatik korpuslarının təmsilçiləri qatılmışlar.

Tətənəli mərasimdə Sankt-Peterburq Dövlət Filarmoniyasının orkestri bu dəfə tamaşaçılar önünə Azərbaycanın xalq artisti Teymur Göyçayevin drijorluğu ilə çıxmışdır. Azərbaycanlı tenor, opera ifaçısı, xalq artisti Samir Cəfərov, beynəlxalq müsabiqələr laueratı, Azərbaycan Dövlət Musiqili Teatrının aparıcı səhnə ustası, əməkdar artist Nərgiz Kərimova, Bülbül adına Musiqi Məktıbinin şagirdi Atabəy İsmayılov (tarda) gözəl ifaları ilə tamaşaçılara Azərbaycan mədəniyyətinin zənginliyini nümayiş etdirmişlər.