Azərbaycan terrorizmlə mübarizədə öz səylərini möhkəmləndirməkdə davam etmişdir. Trend-in məlumatına görə, bu barədə ABŞ Dövlət Departamentinin 2013-cü il terrorizmlə bağlı hesabatında deyilir.

Departamentin rəsmi saytında dərc olunan hesabatda bildirilir: “Azərbaycan terrorizmlə mübarizə sahəsindəABŞ ilə  sıx əməkdaşlıq etmiş və Qafqaz ərazisi vasitəsilə insanları, pulu və əşyaları daşımaq istəyən terror təşkilatlarına qarşı aktiv müqavimət göstərmişdir”.

Hesabatda qeyd olunur ki, ölkə xeyli miqdarda qeyri-qanuni silah-sursat müsadirə etmişdir.

ABŞ Dövlət Departamentinin hesabatında Azərbaycanın Milli Təhlükəsizlik və Daxili İşlər nazirliklərinin terrorizmlə mübarizə sahəsində fəaliyyəti də dəyərləndirilmişdir.

Hesabatda deyilir: “Azərbaycan pulların yuyulması və terrorizmin maliyyələşdirilməsinə qarşı mübarizənin qiymətləndirilməsi üzrə Ekspertlər Komitəsinin (Moneyval), İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupunun (FATF) üzvüdür. 2009-cu ildə çirkli pulların yuyulması və terrorizmin maliyyələşdirilməsi ilə mübarizə sahəsində qanunvericiliyin qəbulundan sonra Azərbaycan bu sahədə öz peşəkarlığını artırmışdır. Ölkə çirkli pulların yuyulması və terrorizmin maliyyələşdirilməsi ilə mübarizə sahəsində Moneyvalin tövsiyələrini yerinə yetirməyə davam etmişdir”.