Tehran Universitetinin rəsmi xəbər portalı olan www.ccsi.ir Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənovun “Prezident İlham Əliyevin İrana səfəri münasibətlərin inkişafında yeni mərhələnin təməlini qoydu” sərlövhəli müsahibəsini fars dilində yaymışdır.

Ölkənin Qərbi Azərbaycan Vilayətinin mərkəzi Urmiya şəhərində fəaliyyət göstərən “Dəniz” qəzeti isə müsahibəni internet saytında AzərTAc-a istinadla Azərbaycan dilində yerləşdirmişdir. Müsahibədə Azərbaycan Respublikasının Prezidenti

İlham Əliyevin aprelin 9-da İran İslam Respublikasına rəsmi səfərinin ayrı-ayrı istiqamətləri şərh edilmişdir. Səfərin tarixi əhəmiyyəti haqqında danışan Əli Həsənov müsahibəsini bu sözlərlə bitirir: “Hesab edirəm ki, Azərbaycan Prezidentinin İrana rəsmi səfəri iki ölkə arasında dostluq və tərəfdaşlıq əlaqələrinin inkişaf etdirilməsi və qarşılıqlı faydalı əməkdaşlığın daha da dərinləşdirilməsi üçün mühüm mərhələnin başlanğıcı oldu. Səfər bir daha təsdiq etdi ki, İran-Azərbaycan əlaqələri möhkəm zəmin üzərində qurulub və qarşılıqlı maraqlara xidmət edir”.