Azərbaycanın BMT-dəki Daimi Nümayəndəliyi BMT-nin baş katibinə və BMT-nin Baş Məclisinə Ermənistanın Azərbaycana qarşı hərbi təcavüzü ilə bağlı məktub ünvanlamışdır.
Məktubda erməni hərbçilərinin Azərbaycanın işğal olunmuş torpaqlarındakı zorakılığından, Xocavənd rayonundakı hərbi hissədə iyulun 28-də baş vermiş silahlı insidentdən söz açılmışdır. Qeyd edilmişdir ki, bu hadisə rəsmi Yerevanın Azərbaycana qarşı hərbi əməliyyatlarda Ermənistan silahlı qüvvələrinin birbaşa iştirakını və onların işğal olunmuş ərazilərdə olmasını ört-basdır etmək cəhdlərinə baxmayaraq, Ermənistanın həmin ərazilərə hərbi nəzarəti həyata keçirdiyini açıq-aydın göstərir.
BMT və Avropa Parlamenti kimi beynəlxalq qurumlar Azərbaycanın ərazi bütövlüyünü tanımışlar və bu, Ermənistanın hərəkətlərinin qeyri-qanuni olduğunu sübut edir. Azərbaycanın BMT-dəki Daimi Nümayəndəliyi Məclisdən məktubu BMT Baş Məclisinin gündəliyinin Dağlıq Qarabağ münaqişəsi və GUAM ölkələrində həlli uzadılmış münaqişələrlə bağlı 14-cü və 18-ci maddələrinin əsasında qəbul etməsini xahiş etmişdir.
BMT-nin informasiya mərkəzindən bildirmişlər ki, məktub artıq qurumun baş katibinin ofisi tərəfindən qəbul olunmuşdur. Müraciət baxılmaq üçün Baş Məclisin növbəti sessiyasının gündəliyinə əlavə edilmişdir.
AzərTAc{nl}