Bu gün zaman Ermənistanın xeyrinə işləmir. Bu fikri Rusiya eksperti, Strategiya və Texnologiyaların Təhlili Mərkəzinin direktoru Ruslan Puxov NEWS.am informasiya portalının müxbirinə müsahibəsində bildirmişdir.
Ekspertin sözlərinə görə, Azərbaycan tərəfdaş kimi getdikcə daha cəlbedici olur. O demişdir: "Dünyada bir neçə dövlət vardır ki, bütün ölkələr onların rəğbətini qazanmağa çalışırlar. Bir sıra amillər sayəsində Azərbaycan bu gün belə ölkələrdən birinə çevrilir. Hazırda Azərbaycan Rusiya, ABŞ, İran üçün maraq doğurur". R.Puxov daha sonra əlavə etmişdir: "Bu təbiidir ki, Azərbaycan yaranmış geosiyasi vəziyyətdən maksimum səmərə ilə istifadə etməyə çalışır. Odur ki, Azərbaycan Ermənistana, o cümlədən Dağlıq Qarabağ məsələsində daha güclü siyasi, iqtisadi və hərbi təzyiq göstərmək imkanına malikdir".
"Dağlıq Qarabağda hərbi əməliyyatların bərpa olunması nə dərəcədə mümkündür" sualına cavab verən ekspert vurğulamışdır ki, nə Rusiya, nə də ABŞ bunu istəməsə də, Azərbaycan və Ermənistan yetərincə müstəqil regional vahidlərdir və onlardan biri hərbi qüvvə tətbiq etməzdən əvvəl çətin ki, kiminləsə məsləhətləşsin.