Çexiya Senatının Avropa İttifaqı məsələləri üzrə komitəsinin sədri Miroslav Kreyçanın başçılığı ilə Azərbaycanda səfərdə olan bu ölkənin parlament nümayəndə heyəti aprelin 15-də Fəxri Xiyabana gələrək, xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini anmış, məzarı önünə güllər qoymuşdur.

Görkəmli oftalmoloq alim, akademik Zərifə Əliyevanın da xatirəsi anılmış, məzarı önünə güllər qoyulmuşdur.

Sonra qonaqlar Şəhidlər Xiyabanına gələrək, Azərbaycanın  müstəqilliyi və ərazi bütövlüyü uğrunda canlarından keçmiş  qəhrəman Vətən övladlarının xatirəsini anmış, məzarları üzərinə tər  çiçəklər düzmüşlər.

Qonaqlar Bakının ən hündür nöqtəsindən Azərbaycan paytaxtının mənzərəsini  seyr etmişlər. Onlara Şəhidlər Xiyabanının tarixi, ölkəmizdə həyata keçirilən tikinti və quruculuq işləri barədə məlumat verilmişdir.

Miroslav Kreyça  jurnalistlərə müsahibəsində demişdir ki, Çexiya senatorları Azərbaycan Milli Məclisində, habelə ölkənin müxtəlif dövlət qurumlarında görüşlər keçirəcək, ikitərəfli əlaqələrin perspektivlərini və siyasi əməkdaşlığın prioritetlərini müzakirə edəcəklər.

AzərTAc