Avropa Şurası Parlament Assambleyasının (AŞPA) yaz sessiyası çərçivəsində qurumun Nazirlər Komitəsinə sədrliyin Azərbaycana keçməsi ilə əlaqədar AŞPA bürosunun və daimi komitəsinin may ayının 22-23-də Bakıda baş tutacaq iclasları ilə bağlı milli nümayəndə heyətləri katiblərinin toplantısı keçirilmişdir.

Toplantıda AŞPA-dakı Azərbaycan nümayəndə heyətinin katibi İlqar Məcidli həmin tədbirlərlə bağlı görülən hazırlıq işləri barədə məlumat vermişdir. AŞ Nazirlər Komitəsinə sədrliyin Azərbaycan üçün məsuliyyətli və eyni zamanda, şərəfli bir missiya olduğunu diqqətə çatdıran İ.Məcidli ölkəmizin bu tarixi sınaqdan da uğurla çıxacağına əminliyini ifadə etmiş, sədrliyin Azərbaycanın Avropa Şurası ailəsinin layiqli üzvü olaraq bu təşkilatın fəaliyyətinə verəcəyi töhfə kimi dəyərləndirmişdir.

  Milli nümayəndə heyətinin katibi Azərbaycan parlamentinin Bakıda keçiriləcək tədbirlərə ciddi şəkildə hazırlaşdığını vurğulayaraq hazırlıq işlərinin sürətlə getdiyini, bu məsələdə AŞPA katibliyi ilə sıx əməkdaşlığın həyata keçirildiyini qeyd etmiş, tədbir iştirakçılarının Bakıdan ən xoş təəssüratlarla ayrılacağına əminliyini bildirmişdir.

Sonda toplantı iştirakçılarının sualları cavablandırılmışdır.

Əsgər ƏLİYEV,

AzərTAc-ın xüsusi müxbiri

Strasburq