Azərbaycan Respublikasının xarici işlər naziri  Elmar Məmmədyarov ölkəmizdə rəsmi səfərdə olan Tacikistan Respublikasının xarici işlər naziri Sirociddin Aslovun başçılıq etdiyi nümayəndə heyəti ilə görüşmüşdür.

AzərTAc xəbər verir ki, görüşdə Azərbaycan  ilə Tacikistan arasında siyasi əlaqələrin mövcud səviyyəsinin məmnunluq doğurduğu və əməkdaşlığın dinamik surətdə inkişaf etdiyi qeyd olunmuşdur.

 Nazir E.Məmmədyarov Ermənistan – Azərbaycan münaqişəsinin həllində nümayiş etdirdiyi mövqeyinə görə Tacikistan tərəfinə təşəkkür etmişdir.

Tacikistan Respublikasının xarici işlər naziri Sirociddin Aslov Azərbaycanın regionun lider dövləti olduğunu qeyd edərək, ölkəmizin və xüsusilə paytaxt Bakının inkişafının müsbət təsir bağışladığını bildirmişdir.

 Ölkələrimiz arasında siyasi, iqtisadi, dağ-mədən sənayesi, sərmayələr, nəqliyyat, təhsil və mədəniyyət sahələrində əlaqələrin inkişaf etdirilməsi və beynəlxalq təşkilatlar çərçivəsində əməkdaşlıq məsələləri üzrə fikir mübadiləsi aparılmış və ticarət əlaqələrinin genişləndirilməsi istiqamətində səylərin artırılmasının vacibliyi vurğulanmışdır.

Görüşdə rəsmi səviyyədə təmasların və qarşılıqlı səfərlərin davam etdirilməsinin əhəmiyyəti qeyd olunmuşdur.

  Sonda “Azərbaycan Respublikası Xarici İşlər Nazirliyi və Tacikistan Respublikasının Xarici İşlər Nazirliyi arasında 2014-2015-ci illər üzrə əməkdaşlıq proqramı” imzalanmışdır. Proqramı Elmar Məmmədyarov və Sirociddin Aslov imzalamışlar.