Avropa enerji təchizatını diversifikasiya etməlidir və Rusiyadan enerji asılılığını azaltmalıdır.

APA-nın məlumatına görə, bu barədə Böyük Britaniya parlamentinin deputatı, energetika və iqlim dəyişikliyi komitəsinin üzvü Kristofer Pinçerin məqaləsində deyilir.

Deputat hesab edir ki, Ukraynada baş verənlər üzündən bu zərurəti Britaniya da inkar edə bilməz. Onun fikrincə, diversifikasiya prosesində Azərbaycandan qaz tədarükü vacib rol oynayacaq.

“Dünyada ikinci olan Azərbaycanın “Şahdəniz” qaz yatağını nəzərə alsaq, qaz təchizatında hər hansı çatışmazlıq yoxdur”, - deyə o vurğulamışdır. 

Pinçer qeyd etmişdir ki, Xəzər dənizindən, hətta Şimali İraqdakı Kürdüstandan təbii qaz Qərbə nəql oluna bilər: “Hasilatla yanaşı Azərbaycan çox güman ki, bütün Orta Asiya qazının tranzit mərkəzinə çevriləcək”.

“Azərbaycan Rusiyadan yan keçməklə, neft və qazı Qərbi Avropaya nəql edə biləcək boru xətləri şəbəkəsini maliyyələşdirə və təşkil edə bilər”, – deyə o vurğulamışdır.

Pinçer bildirmişdir ki, Avropa Birliyi “Şahdəniz-2”dən hasil olunacaq qazın nəqli üçün boru xəttinin inşasında maraqlıdır: “İndi bu niyyət əməli hərəkətə çevrilməlidir”.

Britaniyalı deputat qeyd etmişdir ki, Böyük Britaniya və Avropa Birliyi Cənubi Qafqazdakı qaz istehsalçıları ilə daha sıx əməkdaşlıq etməlidir. Konkret olaraq o hesab edir ki, Britaniya Xəzər dənizi bölgəsində bp-nin liderliyini qoruyub saxlamalıdır. 

Pincerin fikrincə, Avropa Rusiyadan enerji asılılığına son qoymadan Ukraynaya faydalı dəstək verə bilməyəcək, habelə Rusiya siyasətinə müqavimət göstərə bilməyəcək.