Litva Respublikası Milli Dirçəliş Partiyasının sədri, Litva Seyminin xarici əlaqələr komitəsinin və Litva-Azərbaycan parlamentlərarası dostluq qrupunun üzvü Arunas Valinskasın rəhbərliyi ilə Bakıda səfərdə olan nümayəndə heyəti avqustun 16-da Milli Məclisin beynəlxalq münasibətlər və parlamentlərarası əlaqələr komitəsinin üzvləri ilə görüşmüşlər.
Komitənin sədri Səməd Seyidov qonaqlara Azərbaycan parlamentinin yaranma tarixi, fəaliyyəti, beynəlxalq əlaqələri barədə ətraflı məlumat vermişdir. O demişdir ki, dövlətlərimiz və xalqlarımız arasında yaxşı dostluq münasibətləri vardır. Deputatlarımız beynəlxalq təşkilatlarda qarşılıqlı maraq kəsb edən məsələlərdə eyni mövqedən çıxış edirlər. Bu da dostluq əlaqələrimizin inkişafında mühüm rol oynayır.
Arunas Valinskas demişdir ki, səfərin məqsədi ölkələrimiz, xalqlarımız, eləcə də parlamentlərimiz arasında əlaqələrin inkişafına dair fikir mübadiləsi aparmaqdır. Litva Azərbaycan ilə siyasi, iqtisadi, mədəni və humanitar sahələrdə münasibətlərin genişlənməsində maraqlıdır.
Tərəflər əlaqələrin daha da genişlənməsi və möhkəmlənməsi üçün qarşılıqlı səfərlərin təşkilinin əhəmiyyətindən danışmışlar.
Görüşdə Azərbaycan və Litva xalqlarının azadlıq mübarizəsinin nəticələri, müstəqillik illərində əldə olunmuş nailiyyətlər, eləcə də təbii fəlakətlərin aradan qaldırılması və digər məsələlərdə birgə əməkdaşlığa dair fikir mübadiləsi aparılmışdır.