Azərbaycan Prezidenti İlham Əliyevin 2005-ci il 4 mart tarixli Sərəncamı ilə hər il martın 5-i ölkəmizdə Bədən Tərbiyəsi və İdman Günü kimi geniş qeyd olunur.

AzərTAc xəbər verir ki, əlamətdar gün münasibətilə Azərbaycanın idman ictimaiyyətinin, müvafiq qurumların nümayəndələri martın 5-də Fəxri Xiyabana gələrək, xalqımızın ümummilli lideri Heydər Əliyevin xatirəsini ehtiramla anmış, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın da məzarı üzərinə gül dəstələri düzülmüşdür.

Sonra idman ictimaiyyətinin nümayəndələri Şəhidlər Xiyabanını ziyarət edərək, Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anmış, məzarları önünə çiçəklər düzmüş, “Əbədi məşəl” abidəsinin qarşısına əklil qoymuşlar.

Daha  sonra 50-dən artıq velosipedçi Azərbaycanın dövlət  bayrağı ilə Şəhidlər Xiyabanından Hüseyn Cavid bağınadək yürüş etmişdir.