Böyük Britaniyanın Azərbaycandakı səfiri İrfan Siddiq Xəzər Universitetində “Böyük Britaniya və Şimali İrlandiyanın Birləşmiş Krallığının siyasəti və siyasi mədəniyyəti”adlı məruzə ilə çıxış etmişdir.

Trend-in məlumatına görə, universitet tələbələrinin iştirak etdiyi tədbirdə səfir əvvəlcə təmsil etdiyi ölkənin siyasi ənənələri barədə danışmışdır. O həmçinin ölkənin xarici siyasəti və onun əsas məqsədlərindən söhbət açmışdır.

Məruzədə İ.Siddiq Ukraynada və digər ölkələrdə müşahidə olunan qeyri-stabil vəziyyətlərə də toxunmuşdur.

Azərbaycanla əlaqələr barədə danışan İ.Siddıq demişdir ki, Böyük Britaniya Azərbaycanla, xüsusilə enerji və iqtisadi sahələrdə güclü əlaqələrə malikdir. O əlavə etmişdir ki, Azərbaycanda Britaniya şirkətləri fəaliyyət göstərir və onlar bu ölkənin inkişafına kömək edirlər: “Əlaqələrimiz əladır. Britaniya Azərbaycanda ən böyük xarici sərmayəçidir. Bu, həm Azərbaycan, həm də Britaniya üçün faydalıdır”.

Səfir əlavə etmişdir ki, çoxlu sayda azərbaycanlı tələbə Böyük Britaniyada təhsil alır: “Eyni zamanda, çoxsaylı azərbaycanlı turistlər də Britaniyanı ziyarət edirlər. Biz viza sistemini də dəyişdik ki, onu daha da təkmilləşdirək. Çünki ildən-ilə daha çox azərbaycanlı turist Britaniyaya səfər edir”.

Diplomat Dağlıq Qarabağ münaqişəsinə də toxunmuşdur: “Hamı razılaşır ki, Ermənistan işğal olunmuş ərazilərdən çəkilməlidir və bu torpaqlar Azərbaycana qaytarılmalıdır”.