Martın 3-də Bolqarıstanın Azərbaycandakı səfirliyi ölkəsinin milli bayramı münasibətilə rəsmi qəbul təşkil etmişdir.

AzərTAc xəbər verir ki, Azərbaycanın və Bolqarıstanın dövlət himnləri səslənmişdir.

Səfir xanım Maya Xristova qəbulda çıxış edərək ölkəsinin keçdiyi inkişaf yolundan, Bolqarıstan ilə Azərbaycan arasında əlaqələrin tarixindən söhbət açmışdır. Hazırda hər iki ölkənin əlaqələrinin inkişaf etdiyi diqqətə çatdırılmışdır. Beynəlxalq təşkilatlar çərçivəsində uğurlu əməkdaşlığın mövcud olduğunu söyləyən diplomat yüksək səviyyəli qarşılıqlı səfərlərin əlaqələrin inkişafına töhfə verdiyini vurğulamışdır. Səfir hər iki ölkənin gələcəyə doğru inamla addımladığını qeyd etmişdir.

Nəqliyyat naziri Ziya Məmmədov əlamətdar gün münasibətilə Bolqarıstan xalqını Azərbaycan Prezidenti İlham Əliyevin adından təbrik etmiş, dövlətimizin başçısının xoş arzularını çatdırmışdır.  Nazir əlaqələrimizin ildən-ilə genişlənərək strateji əməkdaşlıq səviyyəsinə çatdığını söyləmişdir.

Bildirilmişdir ki, ölkələrimiz arasında imzalanmış 60-dək sənəd iqtisadi və mədəni sahələrdə əməkdaşlığın inkişafı üçün yeni imkanlar yaratmışdır. Bundan başqa, Azərbaycan ilə Bolqarıstan arasında beynəlxalq təşkilatlarda da uğurlu əməkdaşlıq mövcuddur. Nazir əmin olduğunu bildirmişdir ki, ölkələrimiz arasında dostluq münasibətləri getdikcə daha da möhkəmlənəcək və dərinləşəcəkdir.

Qəbulda dövlət və hökumət rəsmiləri, Milli Məclisin deputatları, xarici ölkələrin Bakıdakı səfirləri, beynəlxalq təşkilatların ölkəmizdəki təmsilçiləri, paytaxt ictimaiyyətinin nümayəndələri iştirak etmişlər.