Beynəlxalq Avrasiya Mətbuat Fondunun (BAMF) informasiya departamentindən bildirmişlər ki, BMT-nin Azərbaycandakı nümayəndəliyinin İctimai İnformasiya Departamentinin rəhbəri xanım Envera Selimoviç və BAMF sədri Umud Rəhimoğlu Minilliyin İnkişaf Məqsədləri çərçivəsində Yevlaxda rayon icra hakimiyyətinin başçısı Elmar Vəliyevlə görüşmüşlər.
Görüşdə E.Selimoviç və U.Rəhimoğlu yaxın gələcəkdə Yevlax şəhərində Minilliyin İnkişaf Məqsədlərinə həsr olunacaq birgə tədbirin keçirilməsi təklifini irəli sürmüşlər. Müzakirələr nəticəsində yaxın günlərdə birgə tədbirin keçirilməsi haqqında ilkin razılıq əldə olunmuşdur. Bu istiqamətdə müzakirələr davam etdiriləcəkdir.
Xanım Selimoviç bu ilin sentyabrında BMT-nin Nyu-Yorkdakı qərargahında keçiriləcək Minilliyin İnkişaf Məqsədləri sammitinin əhəmiyyətini vurğulayaraq, Azərbaycanın bu məqsədlərə çatmaq əzmini xüsusi qeyd etmişdir. Qonaq Azərbaycan hökumətinin Minilliyin İnkişaf Məqsədlərinin tərkib hissəsi olan yoxsulluğun səviyyəsinin azaldılması, iş yerlərinin açılması, ümumi ibtidai təhsilin təmin edilməsindəki irəliləyişi, həmçinin Yevlax kimi mütərəqqi rayonların rolunun olduğunu vurğulamışdır.
E.Selimoviç və U.Rəhimoğlu görüş əsnasında Yevlax şəhərində aparılan quruculuq və abadlıq işlərindən məmnun qaldıqlarını bildirmişlər.
Qeyd edək ki, Minilliyin İnkişaf Məqsədləri 2015-ci ilə qədər ifrat yoxsulluğun yarıbayarı azaldılması, HİV/AİDS-in yayılmasının dayandırılması və ümumi ibtidai təhsilin təmin edilməsi kimi hədəfləri əhatə edən beynəlxalq məqsəddir və bütün dünya ölkələri, həmçinin dünyanın aparıcı təşkilatları arasında razılaşdırılmış fəaliyyət planını təşkil edir.