Naxçıvan Muxtar Respublikası Ali Məclisinin sədri Vasif Talıbov Türkiyənin İğdır vilayətinin valisi Amir Çiçəklə görüşmüşdür.
Valini səmimiyyətlə salamlayan Ali Məclisin sədri Vasif Talıbov ona yeni vəzifəsində uğurlar arzulamış, fəaliyyəti dövründə Azərbaycanın Naxçıvan Muxtar Respublikası ilə İğdır vilayəti arasında mövcud əlaqələrin daha da möhkəmlənəcəyinə əminliyini ifadə edərək demişdir: Türkiyə ilə Azərbaycanı siyasi, iqtisadi maraqlardan daha çox soykök, milli və ortaq dəyərlər birləşdirir. Ona görə də bu dəyərləri davam etdirmək bizim mənəvi borcumuzdur. Əsası iki qüdrətli şəxsiyyət - xalqlarımızın ümummilli liderləri Mustafa Kamal Atatürk və ulu öndər Heydər Əliyev tərəfindən qoyulmuş yol bizim üçün bir örnəkdir və bu yol hər iki ölkənin rəhbərləri tərəfindən uğurla davam və inkişaf etdirilməkdədir.
İğdır valisi Amir Çiçək bu vəzifədə fəaliyyət göstərəcəyi dövrdə Naxçıvan Muxtar Respublikası ilə qarşılıqlı əlaqələrin hər bir sahədə daha da genişlənməsinə çalışacağını vurğulamış, səmimi görüşə görə minnətdarlığını bildirmişdir.
Türkiyənin Naxçıvandakı baş konsulu Ayhan Enginar görüşdə iştirak etmişdir.{nl}