NATO-nun 61-ci ildönümü ilə əlaqədar NATO Əməkdaşlıq İnstitutu Alyansa üzv dövlətlərin Azərbaycandakı səfirlikləri ilə bərabər apreli ölkəmizdə NATO ayı elan etmişdir.
Aprelin 8-də Azərbaycan Dillər Universitetində həmin tədbirlər silsiləsindən növbəti görüş keçirilmişdir.
Tədbirdə Rumıniyanın Azərbaycandakı səfiri Nikolaye Ureke, Azərbaycan NATO Əməkdaşlıq İnstitutunun direktoru Fərrux Məmmədov, ADU-nun professor-müəllim heyəti və tələbələri iştirak etmişlər.
Tədbiri açan universitetin rektoru, Milli Məclisin deputatı Səməd Seyidov ölkəmizin Avropaya inteqrasiya istiqamətində əhəmiyyətli addımlar atdığını demişdir. Azərbaycanın beynəlxalq təşkilatlarla, xüsusilə də NATO ilə əməkdaşlığa böyük önəm verdiyini qeyd edən rektor ölkəmizin alyansın proqramlarında fəal iştirak etdiyini vurğulamışdır.
Nikolaye Ureke müasir dövrdə NATO-nun fəaliyyət dairəsinin getdikcə daha da genişləndiyini, alyansın təkcə təhlükəsizliyin təmin edilməsində deyil, eləcə də demokratiyanın inkişafında mühüm rol oynadığını qeyd etmişdir. Diplomat vurğulamışdır ki, Azərbaycan NATO-nun həyata keçirdiyi antiterror əməliyyatlarında fəal iştirakı, mühüm geostrateji mövqeyi və Avropanın enerji təhlükəsizliyinin təmin edilməsində oynadığı rolu baxımından Alyansın xüsusi önəm verdiyi tərəfdaşlarından biridir.
Sonda NATO-nun fəaliyyətindən bəhs edən sənədli film nümayiş etdirilmişdir.{nl}