Avqustun 10-da Naxçıvan Muxtar Respublikası Ali Məclisinin sədri Vasif Talıbov İran İslam Respublikasının muxtar respublikada yeni təyin olunmuş baş konsulu Məhəmmədtağı Məhəmmədəli ilə görüşmüşdür.
Məhəmmədtağı Məhəmmədəli etimadnaməsini Ali Məclisin sədrinə təqdim etmişdir.
Ali Məclisin sədri Vasif Talıbov İranın Naxçıvandakı baş konsulluğunun ölkələrimiz arasında münasibətlərin uğurlu inkişafına xidmət etdiyini bildirmiş, muxtar respublikaya təyin olunmuş yeni baş konsulun da bu istiqamətdə fəaliyyət göstərəcəyinə əminliyini ifadə edərək demişdir: Azərbaycan-İran dost, qardaş, qonşu ölkələrdir. Siz Naxçıvandakı fəaliyyətiniz dövründə də dostluq, qardaşlıq və yaxın qonşuluq münasibətlərini hiss edəcəksiniz. Bu əlaqələrin daha da genişləndirilməsi istiqamətində fəaliyyətiniz üçün Naxçıvanda sizə lazımi şərait yaradılacaqdır.
Ali Məclisin sədri baş konsula bu istiqamətdəki fəaliyyətində uğurlar arzulamışdır.
Baş konsul Məhəmmədtağı Məhəmmədəli böyük quruculuq işləri aparılan Naxçıvanda çalışacağından şərəf duyduğunu, burada işlədiyi müddətdə ölkələrimiz arasında əlaqələrin genişlənməsinə və dərinləşməsinə xidmət edəcəyini bildirmişdir.
Görüşdə qarşılıqlı maraq doğuran bir sıra məsələlər müzakirə olunmuşdur.{nl}