Bakı səfərinin yekunları barədə jurnalistlərin suallarını cavablandıran Gürcüstanın Baş naziri İrakli Qaribaşvili demişdir ki, Azərbaycan Gürcüstanın strateji tərəfdaşıdır.

AzərTAc Gürcüstan mətbuatına istinadla xəbər verir ki,

İ.Qaribaşvili Gürcüstanın Azərbaycanla siyasi, iqtisadi, mədəni və digər sahələrdə çoxəsrlik sıx əlaqələrinin mövcud olduğunu bildirmiş, bu əlaqələrin inkişafının zəruriliyini qeyd etmişdr.

İ.Qaribaşvili bildirmişdir ki, “Şahdəniz-2” layihəsi üzrə yekun investisiya qərarının imzalanması Avropa üçün həlledici əhəmiyyətə malikdir. Çünki Azərbaycan Prezidenti İlham Əliyevin qeyd etdiyi kimi, bu qərar yaxın gələcəkdə Avropanın enerji xəritəsini tamamilə dəyişəcəkdir.

Gürcüstanın bu layihədən hansı mənfəət əldə edəcəyinə gəldikdə, Baş nazir diqqətə çatdırmışdır ki, təxminən beş il ərzində ölkəsinə 700 milyon dollar məbləğində investisiya yatırılacaq, üç minədək iş yeri yaradılacaq, qaz kəmərinin buraxılış qabiliyyəti 16 milyard kubmetrədək artacaqdır ki, bunun da beş faizi Gürcüstanda qalacaqdır.

İ.Qaribaşvili iki ölkə arasındakı çoxtərəfli əlaqələrin gələcəkdə daha da dərinləşəcəyinə ümidvar olduğunu ifadə etmişdir.