“Mən Rusiya ilə münasibətlərin bütövlükdə Avropa ilə və ayrı-ayrılıqda Avropa ölkələri ilə münasibətlərə qarşı qoyulmasının tərəfdarı deyiləm”. Trend-in məlumatına görə, bunu Milli Məclisin vitse-spikeri Bahar Muradova jurnalistlərə “Rusiya assosiativ sazişi imzalamamaq məsələsində Ukrayna kimi, Azərbaycana təsir göstərə bilərmi?” sualına cavabında demişdir.

B.Muradova qeyd etmişdir ki, Azərbaycan ilə Rusiya arasında münasibətlər yaxşı səviyyədədir və münasibətlərin daha yaxşı səviyyəyə qaldırılması üçün Azərbaycan öz üzərinə düşəni artıqlaması ilə yerinə yetirir: “Azərbaycan bütün istiqamətlərdə dövlətin və xalqın maraqlarına cavab verə biləcək addım atır və ölkə Prezidentinin siyasəti məhz bu istiqamətə yönəlir. Bu yeganə düzgün siyasətdir və nəticələri də bizim üçün müsbətdir. Ukraynada baş verən hadisələrə gəldikdə, mən tərəfdarı deyiləm ki, hansısa bir ölkədəki vəziyyət Azərbaycandakı vəziyyət ilə müqayisə olunsun və yaxud da bir ölkədə baş verən hadisələrə görə digəri üçün nəticə çıxarılsın”.

Vitse-spiker hesab edir ki, bu, yanlış yoldur və bu ölkələrdəki ictimai-siyasi durum, iqtisadi vəziyyət, onların qarşısında dayanan hədəflər, bu hədəflərə getmələri üçün seçdikləri yol fərqlidir: “Azərbaycan regionda hər cəhətdən lider dövlət kimi öz mövqeyini açıq şəkildə dünyaya bəyan edir və Azərbaycanın bu mövqeyi də qəbul olunur. Bu vəziyyətlərin qarşı-qarşıya qoyulması və qarşılıqlı nəticə çıxarılması heç zaman doğru ola bilməz və hesab edirəm ki, hər kəsin bu istiqamətdə öz yolu var”.