Dekabrın 2-də Bakıdakı “Hyatt Regency” mehmanxanasında Azərbaycan Respublikasının Prezidenti yanında Gənclər Fondunun fəaliyyəti və növbəti qrant müsabiqəsi ilə bağlı toplantı keçirilmişdir.

Toplantıda ölkəmizdə fəaliyyət göstərən gənclər təşkilatlarının rəhbərləri, qeyri-hökumət təşkilatlarının və kütləvi informasiya vasitələrinin nümayəndələri, fəal gənclər iştirak etmişlər.

 Tədbiri giriş sözü ilə açan Azərbaycan Respublikasının Prezidenti Administrasiyasının ictimai-siyasi məsələlər şöbəsi müdirinin müavini, Fondun Müşahidə Şurasının sədri  Tahir Süleymanov Gənclər və İdman Nazirliyi yanında Gənclər Fondunun Prezident İlham Əliyevin 2011-ci il 19 dekabr tarixli Fərmanı ilə yaradıldığını diqqətə çatdırmışdır. Qeyd etmişdir ki, bir il ərzində bir çox uğurlu layihələrə imza atan Gənclər Fondu dövlətimizin başçısının növbəti Fərmanı ilə Azərbaycan Respublikası Prezidenti Administrasiyasının tabeliyinə verilmişdir.

 Müşahidə Şurasının sədri məlumat vermişdir ki, indiyədək Fond tərəfindən beş kateqoriya üzrə 4 qrant müsabiqəsi keçirilmişdir. İlk qrant müsabiqəsində  Fond tərəfindən gənclər təşkilatlarının 129 layihəsi maliyyələşdirilmişdir. Dördüncü qrant müsabiqəsində isə Fonda təqdim edilmiş 973 layihədən  630-u maliyyələşdirilmişdir. Ümumilikdə bu layihələrə 5 milyon 531 min manat vəsait ayrılmışdır.

T.Süleymanov bildirmişdir ki, dekabrın ikinci ongünlüyündə 4-cü qrant müsabiqəsinə yekun vurulacaqdır. Bugünkü tədbirdə Gənclər Fondunun fəaliyyəti ilə bağlı aparılan müzakirələr və məsləhətləşmələrin  nəticələri, verilən təkliflər növbəti 5-ci qrant müsabiqəsində nəzərə alınacaqdır.

Toplantıda “Vətəndaş Cəmiyyətində Debat” İctimai Birliyinin sədri Seymur Hüseynov çıxış edərək Azərbaycan Gənclər Fondu tərəfindən  təkcə gənclər təşkilatlarına deyil, həm də fəal gənclərin fərdi layihələrinə qrant verilməsini yüksək qiymətləndirmişdir. Qeyd etmişdir ki, Azərbaycan Gənclər Fondunun bu gərəkli fəaliyyətinə Avropa Gənclər Fondu da həsəd apara bilər. 

Azərbaycan Respublikası Prezidenti yanında Dövlət İdarəçilik Akademiyası tələbə gənclər təşkilatının sədri Toğrul Niyazlı isə demişdir ki, Fond yaradılana qədər gənclər öz layihə və ideyalarını reallaşdıra bilmirdilər. İndi isə Azərbaycan gəncinin səsi dünyanın hər bir guşəsindən  gəlir. O, gənclərə yaradılan yüksək şəraitə görə Azərbaycan Prezidentinə minnətdarlığını bildirmişdir.

Fəal gənclərdən Dadaş Məmmədov, Sərraf Hüseynov, Vüsalə Hüseynova, Elman Süleymanov və digər  çıxış edənlər də əsası ümummilli lider Heydər Əliyev tərəfindən qoyulmuş dövlət gənclər siyasətinin Prezident İlham Əliyev tərəfindən uğurla davam etdirilməsi nəticəsində bu gün Azərbaycan gənclərinin ictimai-siyasi, sosial-mədəni və digər sahələrdə uğurla fəaliyyət göstərdiklərini vurğulamışlar.

Qeyd edilmişdir ki, ölkəmizdə gənclərlə iş sahəsində görülən tədbirlər Azərbaycan gəncliyinin inkişafına təkan vermiş, onların cəmiyyətdə özlərini təsdiq etmələrində böyük rol oynamışdır.

Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənov tədbirdə çıxış edərək demişdir ki, bu gün ölkəmiz müstəqillik tarixinin olduqca dinamik inkişaf mərhələsini yaşayır. Prezident İlham Əliyevin həyata keçirdiyi uğurlu daxili və xarici siyasət nəticəsində ölkəmizin qarşısında duran vəzifələr müvəffəqiyyətlə öz həllini tapır. Şöbə müdiri demişdir ki, xalqı tanıtmaq üçün millətin nümayəndələrinin hamısını bəlli sahəyə yönəltmək lazım deyil, onların içərisindən ən yaxşı nümunələri, ən yaxşı liderlik keyfiyyətinə malik olanları seçmək gərəkdir. Onların inkişafına ayrıca dəstək verilməli, daha rəqabətli vəziyyətə gətirilməlidir. Belə təşəbbüskar gənclərin  vasitəsilə də beynəlxalq arenaya çıxmaq lazımdır.

Prezident Administrasiyasının  rəsmisi demişdir ki, bu gün hər bir Azərbaycan vətəndaşı dövlətimizin BMT Təhlükəsizlik Şurasının üzvü olması ilə fəxr edir. Bu gün  Azərbaycan dünyanın iqtisadi, siyasi, sosial, mədəni tədbirlərinin keçirildiyi mərkəzə,  Yer kürəsinin ən firavan ölkələrindən birinə çevrilmişdir. Azərbaycan həm mənəvi dəyərləri, intellekti, həm də inkişaf perspektivləri ilə dünyada cəlbedici  məkan kimi tanınır. Bizim bütün bu mənəvi, iqtisadi, sosial, enerji və digər resurslarımız da təkcə Azərbaycan xalqının firavanlığına deyil, bölgənin və dünya ölkələrinin  tərəqqisinə xidmət edir.

Son illərdə Azərbaycanda dövlətdən maliyyə dəstəyi alan gənclərin sayının  çoxaldığını qeyd edən Əli Həsənov bildirmişdir ki, həmin gənclərin layihələrə cəlb olunması daha da asanlaşdırılmalıdır. Bu prosesi  asanlaşdırmaq  yolu ilə mühüm layihələrə daha çox kontingent cəlb etmək mümkündür. Əlbəttə, qrantların miqdarını da artırmaq olar. Əsas odur ki, heç bir gəncin təşəbbüsü diqqətdən  kənarda qalmasın.

Şöbə müdiri demişdir ki,  bu işdə əsas məqsəd liderlik qabiliyyəti olan gəncləri üzə çıxarmaqdan ibarət olmalıdır.  Yadda saxlamaq lazımdır ki, liderlik keyfiyyətlərinə malik olan  həmin gənclərin imkanları çərçivəsində sabah  dövlətimizin və xalqımızın bu və ya digər problemləri həllini uğurla tapacaqdır. İdman, mədəniyyət, siyasət, ictimai həyat sahələrində liderlik qabiliyyəti olan gəncliyimizi dövlətin vəsaiti hesabına  inkişaf etdirmək qarşıda duran ən mühüm vəzifələrdən biri olmalıdır.

Əli Həsənov vurğulamışdır ki, Qərbin heç bir əsası olmadan təlqin etdiyi bu və ya digər üzdəniraq dəyərlərdən, xüsusilə Azərbaycana dost olmayan xarici qüvvələrin bəzən gəncliyə, mətbuata, ayrı-ayrı jurnalistlərə cüzi qrant verməklə  öz xalqına, dövlətinə qarşı istifadə etməsindən və digər bu kimi təhlükələrdən xilas olmaq lazımdır. Gəncləri xarici qüvvələrin mənfi təsirlərindən azad etmək hər birimizin borcudur.

Şöbə müdiri demişdir ki, indiki  qloballaşma şəraitində hər bir Azərbaycan gəncinin öz milli mənəvi dəyərlərini qoruya bilməsinə çalışmaq qarşımızda duran ən mühüm vəzifələrdən biridir.

 Əli Həsənov qeyd etmişdir ki, bütün digər sahələr kimi, Azərbaycan dövlətinin gənclər siyasəti də ümummilli liderimiz Heydər Əliyevin adı və yorulmaz fəaliyyəti ilə bağlıdır. Ulu öndərimiz 1993-cü ildə xalqın təkidli tələbi ilə yenidən hakimiyyətə qayıtdıqdan sonra 1994-cü ildə yaratdığı ilk dövlət qurumu Gənclər və İdman Nazirliyi olmuşdur. Ümummilli liderimiz Gənclər və İdman Nazirliyini yaratmaqla dövlətin gəncliyə münasibətini ortaya qoymuşdur.  

Azərbaycan dövlətinin bugünkü gənclər siyasətinə toxunan Əli Həsənov qeyd etmişdir ki, Prezident İlham Əliyevin  ölkəyə rəhbərlik etdiyi son 10 ildə ən çox diqqət yetirdiyi və prioritet hesab etdiyi sahələrdən biri məhz Azərbaycan gəncliyi olmuşdur. Dövlətimizin  başçısı gənclərin 4 forumunu təşkil etmiş, dəfələrlə Bakıda və bölgələrdə gənclərlə, xüsusilə  idmançılarla  müxtəlif görüşlər keçirmişdir. Məhz Prezident İlham Əliyevin təşəbbüsü ilə Azərbaycan gəncliyi ilə bağlı 2005-2009-cu, 2011-2015-ci illəri əhatə edən iki Dövlət Proqramı qəbul edilmişdir. Hazırda Azərbaycan gəncləri dövlət hesabına müxtəlif ölkələrin  ən qabaqcıl ali məktəblərində təhsil alır və dünyanın ən təminatlı gəncləri sırasında öncül yerlərdə dayanırlar.

Prezident Administrasiyasının rəsmisi demişdir ki, dövlətimizin başçısının iki Sərəncamı ilə Fonda 10 milyon manat pul ayrılmışdır. Lakin dövlətimizin başçısının da dediyi kimi, bu, son hədd deyildir. Gənclər və İdman Nazirliyinin, Fondun təklifləri əsasında  əlavə vəsaitin ayrılması ilə bağlı işlər aparıla bilər. Bir şərtlə  ki, bu maliyyə vəsaitindən səmərəli istifadə olunsun.

Əli Həsənov ümidvar olduğunu bildirmişdir ki, Azərbaycan gəncliyi növbəti beş ildə də Prezident İlham Əliyevin siyasətini dəstəkləməklə, onun həyata keçirdiyi bütün proqramlarda fəal iştirak etməklə, həm də öz gələcəyini təmin edəcəkdir. 

Tədbirdə çıxış edən Azərbaycan Gənclər Fondunun icraçı direktoru Fərhad Hacıyev demişdir ki, yaradıcı gənclər heç bir qrant müsabiqəsindən kənarda qalmayacaqlar. O, Fondun gələcək fəaliyyət istiqamətlərindən danışaraq bildirmişdir ki, növbəti qrant müsabiqəsi daha geniş sahələri əhatə edəcəkdir.

AzərTAc