NATO Parlament Assambleyası nüfuzlu beynəlxalq təşkilat kimi Dağlıq Qarabağ probleminə obyektiv münasibət bildirməlidir.
Bu fikirləri AzərTAc-a açıqlamasında Milli Məclisin deputatı, Azərbaycanın NATO Parlament Assambleyasında nümayəndə heyətinin üzvü Məlahət İbrahimqızı bildirmişdir. Onun sözlərinə görə, Azərbaycan nümayəndə heyəti uzun müddətdir bu qurumda Dağlıq Qarabağ məsələsinin müzakirəyə çıxarılmasına çalışır. Artıq qurumun növbəti sessiyalarında problemin müzakirəsi nəzərdə tutulur.
Ermənistanın bundan narahat olduğunu deyən M.İbrahimqızı qeyd etmişdir ki, parlamentin spikeri Ovik Abramyan NATO PA-nın rəhbəri Con Tannerə qurumun Dağlıq Qarabağ münaqişəsinin müzakirəsindən imtina etməsini xahiş etmişdir. Amma Assambleya problemin müzakirəsindən imtina etmək fikrində deyildir.
M.İbrahimqızı demişdir: "Təbii ki, Ermənistan tərəfinin narahatlığı başadüşüləndir. Ermənilər özlərinin təcavüzkar hərəkətlərinin beynəlxalq müstəvidə getdikcə daha çox ifşa olunmalarından narahatdırlar. NATO nüfuzlu beynəlxalq təşkilat olaraq Ermənistanın təcavüzkar siyasətinə münasibət bildirməlidir. Çünki işğalçılıq siyasəti bütövlükdə beynəlxalq hüquqa qarşı təcavüzdür".
AzərTAc