ABŞ Senatının Xarici Münasibətlər Komitəsinin avqustun 3-də keçirilmiş iclasında Birləşmiş Ştatları 30-dan çox ölkədə təmsil edəcək səfir namizədləri ilə bağlı səsvermə keçirilmişdir. On dəqiqəyə yaxın davam edən iclasda komitənin sədri senator Con Kerri bildirmişdir ki, bəzi səfirlərin namizədlikləri hələ də baxılma mərhələsindədir. Məqsəd nəzərdə tutulan ölkələrə ABŞ-ın "güclü messaj"ını çatdıra biləcək adamlar göndərməkdir. Lakin iclasın yekunlarına görə, səsverməyə qoyulmayan yeganə namizəd Ağ evin Azərbaycana səfir kimi təqdim etdiyi Mətyu Brayzə olmuşdur.
İclasdan sonra Senatın Xarici Münasibətlər Komitəsində respublikaçı azlığın başçısı Riçard Luqar AzərTAc-ın xüsusi müxbirinə bildirmişdir ki, Mətyu Brayzənin namizədliyinin təsdiqi komitənin digər üzvü senator Barbara Bokserə görə ləngidilmişdir. Kaliforniyalı xanım senator komitə üzvü kimi öz hüququndan istifadə edərək Azərbaycana göndərilən namizədin təsdiqini saxlamaqdadır. Cənab Luqar demişdir ki, Mətyu Brayzənin namizədliyini tezliklə təsdiq etmək üçün Dövlət Departamenti senator Barbara Bokserlə müvafiq iş aparır. Mətyu Brayzənin namizədliyini əvvəldən dəstəkləyən Riçard Luqar bir daha bildirmişdir ki, diplomatın işini layiqincə yerinə yetirmək qabiliyyətinə əmindir. Bakıda bir ilə yaxın ABŞ səfiri yerinin boş qalmasının ABŞ-Azərbaycan münasibətlərinə təsir edəcəyindən təəccüblənməyən senator Luqar Ağ evin bu vəzifəyə namizəd irəli sürməsinin nədən bu qədər uzun çəkdiyinin səbəbini də anlamadığını demişdir.
Senat komitəsindən bildirildiyinə görə, Mətyu Brayzənin namizədliyinə növbəti iclasların birində baxılacaqdır. Xatırladaq ki, ABŞ Konqresi avqust ayında yay tətilinə buraxıldığı üçün bu, ən tezi sentyabr ayında baş verə bilər.

Şəfəq AKİFQIZI, AzərTAc-ın xüsusi müxbiri
Vaşinqton