BMT-nin ciddi islahatlara ehtiyacı var. “Trend”in “Anadolu” agentliyinə istinadən verdiyi məlumata görə, bu barədə Türkiyə XİN-in rəhbəri Əhməd Davudoğlu çərşənbə axşamı Vaşinqtonda açıqlama vermişdir.

Ə.Davudoğlu demişdir: “Suriyadakı son hadisələr göstərir ki, BMT dünya birliyini təhdid edən böhranları, onlardan çıxış yollarını axtarıb dərhal reaksiya vermək imkanına malik deyil”.

Nazirin sözlərinə görə, BMT Suriya münaqişəsi nəticəsində yaranmış humanitar problemin həllinə səmərəli təsir göstərə bilmir: “Təəssüf ki, BMT Suriyadakı humanitar vəziyyət üzrə heç bir qətnamə qəbul etməmişdir”.

Əhməd Davudoğlu Birləşmiş Ştatlara rəsmi səfəri zamanı verdiyi açıqlamada Türkiyə ilə ABŞ-ın Dağlıq Qarabağ probleminin həllinə eyni prizmadan yanaşdığını bildirmişdir: “Dağlıq Qarabağ probleminin tez bir zamanda həll ediləcəyinə və bununla da Qafqaz bölgəsində stabilliyin bərqərar olacağına ümid edirik”.