Noyabrın 12-də Bakıda Ticari-iqtisadi əməkdaşlığı üzrə Belarus-Azərbaycan hökumətlərarası komissiyasının səkkizinci iclası keçirilmişdir.

 İclas Azərbaycan Respublikası Baş nazirinin birinci müavini Yaqub Eyyubovun və Belarus Respublikası Baş nazirinin birinci müavini Vladimir Semaşkonun sədrliyi ilə keçmişdir.

Hər iki ölkədən olan nazir müavinlərinin, iri sənaye müəssisələrinin rəhbərlərinin iştirak etdiyi iclasda iqtisadiyyatın müxtəlif sahələrində əməkdaşlıq məsələləri müzakirə olunmuşdur.

Azərbaycan Respublikası Baş nazirinin birinci müavini Yaqub Eyyubov qeyd etmişdir ki, hazırda ölkələrimiz arasında əlaqələr yüksələn xətt üzrə inkişaf edir, bu əlaqələrin daha da möhkəmlənməsi üçün böyük potensial vardır. Y.Eyyubov vurğulamışdır ki, Azərbaycan və Belarusun dövlət başçıları arasında yaxşı münasibətlər ikitərəfli əlaqələrin möhkəmlənməsi üçün böyük stimuldur.

Belarus Respublikası Baş nazirinin birinci müavini Vladimir Semaşko qeyd etmişdir ki, indi əsas məqsəd iqtisadi əməkdaşlığın daha da genişləndirilməsi üçün yeni sahələr üzə çıxarmaqdır. Onun sözlərinə görə, maşınqayırma, kənd təsərrüfatı və başqa sahələrdə tərəfdaşlıq üzrə yaxşı təcrübə toplanmışdır.

İclasda kənd təsərrüfatı texnikası istehsalı Azərbaycana elektrik qatarları və sürətli tramvaylar göndərilməsi, Belarusda Azərbaycan biznesinin fəaliyyəti, bu ölkədə yaşayış binaları tikintisi ilə əlaqədar təkliflər səslənmişdir.

Qeyd edək ki, 2012-ci ildə Azərbaycan ilə Belarus arasında əmtəə dövriyyəsinin həcmi 79,7 milyon dollar, bu ilin yanvar-sentyabr aylarında isə müvafiq göstərici 68,8 milyon dollar olmuşdur.            

   AzərTAc