“BMT Təhlükəsizlik Şurasının qətnamələrinin yerinə yetirilməməsi onun nüfuzuna zərbə vurur, Dağlıq Qarabağ münaqişəsinin sülh yolu ilə həll olunmasının mümkünlüyünə insanların inamını sarsıdır”.

APA-nın xəbərinə görə, bunu İslam Əməkdaşlıq Təşkilatının (İƏT) baş katibi Ekmələddin İhsanoğlu BMT Təhlükəsizlik Şurasının iclasında bildirmişdir.

 İclas dünyada sülh və təhlükəsizliyin təmin olunmasında BMT-İƏT əməkdaşlığına həsr olunmuşdur. O, qeyd etmişdir ki, İƏT Azərbaycan torpaqlarının Ermənistan tərəfindən işğalının davam etməsindən narahatdır: “Tərəfləri münaqişəni sülh yolu ilə, BMT Təhlükəsizlik Şurasının qətnamələrinə uyğun şəkildə, Azərbaycan Respublikasının beynəlxalq hüquq tərəfindən tanınmış sərhədləri və ərazi bütövlüyü çərçivəsində həll etməyə çağırırıq”.