Oktyabrın 24-də Ombudsman Aparatında “BMT və Azərbaycan: insan hüquqları sahəsində əməkdaşlıq” mövzusunda “dəyirmi masa” keçirilmişdir.

Tədbir 24 oktyabr - Birləşmiş Millətlər Təşkilatı Gününə həsr olunmuşdur.

Ombudsman Elmira Süleymanova bildirmişdir ki, 1945-ci il oktyabrın 24-də rəsmi fəaliyyətə başlayan təşkilatın əsas məqsədi beynəlxalq sülhü və təhlükəsizliyi qorumaq, bərabər hüquqlar və xalqların öz müqəddəratını təyin etmək prinsiplərinə hörmət əsasında millətlər arasında dostluq münasibətlərini inkişaf etdirmək, beynəlxalq iqtisadi, sosial, mədəni və humanitar məsələlərin həllində əməkdaşlığı təmin etməkdir. Azərbaycan da BMT-nin inkişaf strategiyasına öz töhfəsini verir və bu qurum ilə əməkdaşlıqda maraqlıdır.

BMT-nin Azərbaycandakı rezident əlaqələndiricisi Antonius Broek qeyd etmişdir ki, təşkilat yarandığı dövrdən sonra bu qurumun üzlərinin sayı təxminən dörd dəfə artmışdır. Azərbaycan 2012-ci ildə BMT-yə üzv olmasının 20 iliyini qeyd etmişdir. Bu dövrdə Azərbaycan ilə BMT arasında sıx əməkdaşlıq əlaqələri qurulmuşdur. Hazırda Azərbaycan BMT sistemi və yerli nümayəndəliklərlə təmsil olunan, ümumilikdə, 19 BMT agentliyini əhatə edir. Bu qurumlar arasında BMT-nin İnkişaf Proqramı, UNİCEF, BMT-nin Qaçqınlar üzrə Ali Komissarlığı, Dünya Səhiyyə Təşkilatı, Beynəlxalq Əmək Təşkilatı və digərləri vardır.

“Dəyirmi masa”da “BMT sənədləri və milli qanunvericiliyin təkmilləşdirilməsi”, “Azərbaycan və BMT: qarşılıqlı əməkdaşlıq”, “Azərbaycanda vətəndaş cəmiyyətinin formalaşması və inkişafında BMT-nin rolu” və digər mövzular üzrə çıxışlar dinlənilmişdir.

Tədbirdə BMT-nin baş katibi Pan Gi Munun Birləşmiş Millətlər Təşkilatı Günü münasibətilə dünya ictimaiyyətinə ünvanladığı müraciəti səsləndirilmişdir.

AzərTAc