“Rusiyada ağır cinayət törətməkdə ittiham olunan Azərbaycan vətəndaşı Orxan Zeynalovun yaxalanması zamanı hakimiyyət nümayəndələrinin davranışları insan hüquqları baxımından açıq şəkildə kobud pozuntularla müşayiət olundu”.

Bunu APA-ya açıqlamasında Azərbaycan Milli Məclisinin Hüquq siyasəti və dövlət quruculuğu komitəsinin sədri Əli Hüseynli demişdir. O, bildirmişdir ki, bütün bu pozuntular Rusiya kimi böyük dövlətin daxili işlər nazirinin hərəkətlərində də özünü göstərdi: “Bu hadisədə milli-dini-irqi tolerantlıq, təqsirsizlik prezumpsiyası, insanın tutulma anından vəkil və tərcüməçi ilə təmin olunmaq hüququ pozulub. Saxlanılan şəxsin ilk andan nümayişkaranə formada işgəncəyə məruz qalması, nazirin kabinetində təhqir olunması və sair məsələlər konvension hüquqların açıq şəkildə pozulmasıdır. Bu baxımdan hesab edirəm ki, insan hüquqları, demokratiya sahəsində MDB-nin heç bir ölkəsi artıq bizimlə müqayisə oluna bilməz”.

Komitə sədri vurğulamışdır ki, Rusiya kimi böyük bir dövlətin ali rütbəli hakimiyyət təmsilçiləri tərəfindən yol verilən bu hallar Qərbin bəzi təşkilatlarının insan hüquqları ilə bağlı qınadığı Azərbaycanda ümumiyyətlə, baş vermir.