Oktyabrın 9-da ölkəmizdə növbəti prezident seçkiləri günündə seçki prosesinin başlandığı ilk dəqiqələrdən etibarən Naxçıvan Muxtar Respublikasında əhali mütəşəkkilliklə seçkilərdə iştirak etmişdir.

Saat 12-də Naxçıvan Muxtar Respublikası Ali Məclisinin sədri Vasif Talıbov ailə üzvləri ilə birlikdə Naxçıvan şəhərindəki 4-15 saylı seçki məntəqəsinə gələrək səs vermişdir.

Sonra Ali Məclisin sədri şəhərdə seçki prosesinin gedişi ilə maraqlanmışdır.  Məlumat verilmişdir ki, Naxçıvan şəhərindəki seçki məntəqələrində 50 minə yaxın seçicinin səs verməsi üçün lazımi şərait yaradılmışdır. 4-15 saylı seçki məntəqəsində 1482 seçicinin səs verməsi nəzərdə tutulmuşdur. Saat 12-yə qədər seçki məntəqəsində seçicilərin 37 faizi səs vermişdir.

Ali Məclisin sədri seçki məntəqəsində seçkilərin gedişini izləyən müşahidəçilərlə görüşmüşdür. Onlar muxtar respublikada seçkilərin qanunvericiliyin tələblərinə uyğun təşkil edildiyini və demokratik şəkildə keçirildiyini qeyd etmiş, müşahidəçilərin fəaliyyəti üçün lazımi şəraitin yaradıldığını bildirmişlər.

Naxçıvan Muxtar Respublikası  Ali Məclisinin mətbuat xidməti