Xarici İşlər Nazirliyinin mətbuat xidmətindən bildirmişlər ki, iyulun 30-da nazir Elmar Məmmədyarov ölkəmizdə səfərdə olan Sosialist İnternasionalının baş katibi Luis Ayala ilə görüşmüşdür.
Azərbaycana səfərindən məmnunluğunu ifadə edən L.Ayala ölkəmizdəki inkişafın onda yüksək təəssürat yaratdığını, xüsusilə qeyri-neft sektorunda böyük irəliləyişin nəzərə çarpdığını bildirmişdir.
Nazir E.Məmmədyarov respublikamızda iqtisadiyyatın inkişafı və əhalinin rifahının yaxşılaşdırılması istiqamətində mühüm addımlar atıldığını qeyd etmişdir.
Ermənistan-Azərbaycan, Dağlıq Qarabağ münaqişəsinin nizamlanması ilə bağlı danışıqlar prosesi barədə qonağa məlumat verən nazir məsələnin həllində Azərbaycan tərəfinin yenilənmiş Madrid prinsiplərini əsas tutduğunu vurğulamışdır.
L.Ayala Azərbaycan kimi mühüm ölkə ilə Sosialist İnternasionalı arasında əməkdaşlıqda maraqlı olduqlarını qeyd etmişdir.
Ermənistan-Azərbaycan, Dağlıq Qarabağ münaqişəsinin nizamlanmasının təmsil etdiyi təşkilatın diqqət mərkəzində olduğunu vurğulayan baş katib bildirmişdir ki, bu problem tezliklə həll olunmalıdır.
L.Ayala Sosialist İnternasionalının regional komitəsinin cari ilin iyununda Yerevanda keçirdiyi iclası barədə məlumat vermişdir. O, regional komitənin növbəti iclasının Bakıda keçirilməsi imkanları ilə maraqlanmışdır. Baş katib bu iclası Bakıda keçirməklə rəhbərlik etdiyi təşkilatın Azərbaycanın mövqeyinin dünya ictimaiyyətinə çatdırılmasına dəstək vermək arzusu kimi qiymətləndirmişdir.
Görüşdə qarşılıqlı maraq doğuran bir sıra məsələlər ətrafında fikir mübadiləsi aparılmışdır.
AzərTAc