Oktyabrın 9-da keçiriləcək prezident seçkilərinin gedişini izləmək üçün Azərbaycana gəlmiş Türkdilli Ölkələrin Parlament Assambleyasının (TürkPA) müşahidə missiyasının üzvləri oktyabrın 2-də Mərkəzi Seçki Komissiyasının (MSK) sədri Məzahir Pənahov ilə görüşmüşlər.

Müstəqil Mətbuat Mərkəzindən bildirmişlər ki, TürkPA-nın nümayəndə heyəti qardaş ölkədə seçkiləri müşahidəçilikdən məmnun olduqlarını söyləmiş, Azərbaycanın seçki sistemi, seçki qurumlarım təşkili prinsipləri və fəaliyyət istiqamətləri ilə maraqlanmışlar.

MSK sədri qonaqlara Azərbaycanda seçki sistemi, seçki institutlarının fəaliyyəti və prezident seçkiləri ilə bağlı ətraflı məlumatlar vermişdir. Məzahir Pənahov bildirmişdir ki, seçki məntəqələri səsverməyə tam hazırdır. Səsvermənin yeri və vaxtı barədə bildirişlər hazırlanaraq seçicilərə çatdırılmışdır. Seçicilərin maarifləndirilməsi ilə bağlı genişmiqyaslı tədbirlər planı hazırlanaraq həyata keçirilmiş və bu istiqamətdə fəaliyyət davam etdirilir.

Qeyd olunmuşdur ki, bu günədək 40 mindən çox müşahidəçi, o cümlədən 1300-ə yaxın beynəlxalq müşahidəçi qeydə alınmış, 1000 məntəqədə veb-kamera quraşdırılmışdır.

MSK sədri seçki prosesinə hazırlıqla bağlı qonaqları maraqlandıran digər sualları da cavablandırmışdır.

AzərTAc