“Avropanın enerji təhlükəsizliyinin ən vacib təminatçısı Cənub Qaz Dəhlizi layihəsidir. İnanıram ki, gələcəkdə bu layihənin əhəmiyyəti daha da artacaqdır”.

Bunu APA-ya açıqlamasında Azərbaycanın ABŞ-dakı səfiri Elin Suleymanov bildirmişdir.

Onun sözlərinə görə, son zamanlar Avropa bazarlarında enerjiyə ehtiyac daha da artır: “Yeni qaz ehtiyatları çox vacibdir. Cənub Qaz Dəhlizinin maraqlı coğrafi bir məqamı da var – burada söhbət təkcə Şərqi Avropadan yox, həm də Cənubi Avropadan gedir. Albaniya, Yunanıstan, İtaliya Azərbaycan üçün çox vacib olan yeni coğrafi reallıq yaradır”.

Hazırda Avropanın enerji təminatı sahəsində Azərbaycanın Rusiyaya rəqib ola biləcəyinə münasibət bildirən səfir vurğulamışdır ki, Azərbaycan və Rusiyaya rəqib deyil, ola da bilməz: “Biz bir-birimizə rəqib kimi baxmamalıyıq, tərəfdaş kimi Avropanın müxtəlif yerlərində işləyə bilərik”.

E.Süleymanov Ermənistanın regional layihələrdən kənarda qalmasına da münasibət bildirmişdir: “Ermənistan nəinki enerji layihələrindən, ümumiyyətlə, hər  sahədə inkişafdan uzaqda qalıb. Ermənistan rəhbərliyi bir qərara gəlməlidir ki, Ermənistan üçün firavan və parlaq gələcək istəyir, yoxsa bugünkü kimi inkişaf etməmiş dövlət olaraq qalmağı seçirlər”.