Sentyabrın 30-da Bakıda Avropa İttifaqı (Aİ) tərəfindən maliyyələşdirilən “Azərbaycan Respublikasının dəniz təhlükəsizliyinin gücləndirilməsi haqqında Tvinninq layihəsi” çərçivəsində tədbir keçirilmişdir.

Dövlət Dəniz Administrasiyasının mətbuat xidmətindən bildirmişlər ki, tədbirdə layihə üzrə Aİ-nin nümayəndələri, Azərbaycan tərəfindən Dövlət Dəniz Administrasiyasının rəisi Qüdrət Qurbanov və Tvinninq layihəsinin Azərbaycan Respublikası tərəfindən rəhbəri Əhməd İsmayılov və başqaları iştirak etmişlər. Tvinninq layihəsi üzrə işçi qrup tərəfindən hazırlanmış normativ-hüquqi aktların layihələri müfəssəl müzakirə olunmuş, layihənin həyata keçirilməsi üzrə hesabatlar dinlənilmişdir.

Eyni zamanda, tədbirdə dəniz üzgüçülüyünün təhlükəsizliyi üzrə Azərbaycan Respublikası qanunvericiliyinin “Dənizdə insan həyatının mühafizəsinə dair Beynəlxalq Konvensiya” və müvafiq Aİ direktivlərinə uyğun təkmilləşdirilməsi, dəniz mühitinin mühafizəsi üzrə Azərbaycan Respublikası qanunvericiliyinin “Dənizin gəmilərdən çirkləndirilməsinin qarşısının alınmasına dair Beynəlxalq Konvensiya” və müvafiq Aİ direktivlərinə uyğun olaraq təkmilləşdirməsi məsələləri müzakirə olunmuşdur.

Həmçinin “Azərbaycan Respublikasının dəniz təhlükəsizliyinin gücləndirilməsi haqqında Tvinninq layihəsi”nin fəaliyyəti dövründə problemlər və onların aradan qaldırılması barədə fikir mübadiləsi aparılmış, “Azərbaycan Respublikasının Ticarət Gəmiçiliyi Məcəlləsi”nə dəyişikliklər edilməsini nəzərdə tutan layihə ilə bağlı təkliflər dinlənilmişdir.

Tədbirdə ekspertlər tərəfindən hazırlanmış fəaliyyət planları və onların müəyyən edilmiş vaxtda yekunlaşdırılması məqsədilə görülmüş işlər barədə resident tvinninq müşaviri Fernando Juan Collado Simon tərəfindən ətraflı məlumat verilmişdir.