Bu fikri Avropa Şurası Parlament Assambleyasının (AŞPA) sədri Jan Klod Minyon qurumun payız sessiyasından əvvəl keçirdiyi ənənəvi mətbuat konfransında Azərbaycanda prezident seçkiləri kampaniyasının gedişinə münasibət bildirərkən səsləndirmişdir.

AŞPA sədri demişdir: Ümumi baxımdan götürsək, Azərbaycanda seçki kampaniyası qənaətbəxşdir. AŞPA bürosunun bu səhər keçirilən iclasında Azərbaycanda prezident seçkilərinə hazırlığın vəziyyəti ilə əlaqədar seçkiöncəsi müşahidə missiyasının rəhbərinin məruzəsi dinlənildi. Orada səslənən fikirləri nəzərə aldıq. AŞPA-nın seçki missiyası seçkiləri müşahidə etmək üçün yaxın vaxtlarda Azərbaycana səfər edəcəkdir.

AŞPA-dakı Azərbaycan və Ermənistan nümayəndə heyətlərinin görüşündən danışan sədr belə görüşlərin onun mandatının əsas məqamlardan biri olduğunu bildirmişdir: Bu cür görüşlərin keçirilməsi mənim mandatımın əsas tərkib hissələrindən biridir. Mən nəticə əldə etmək üçün əlimdən gələni əsirgəməyəcəyəm. Payız sessiyasının gündəliyinin həddindən artıq gərgin olmasına baxmayaraq, hər iki nümayəndə heyətinin rəhbəri ilə görüşməyi nəzərdə tutmuşam. Növbəti plenar sessiya çərçivəsində bu görüş baş tuta bilər.

Əsgər ƏLİYEV,

AzərTAc-ın xüsusi müxbiri

Strasburq