Böyük Britaniyanın nüfuzlu sorğu təşkilatı “Dods Polling” Birləşmiş Krallıq Parlamentinin 100 millət vəkili arasında sorğu keçirmişdir. Sorğu Parlamentin İcmalar Palatasının partiya, region və gender tərkibinə uyğun olaraq paritet əsasında keçirilmişdir.

Trend-in məlumatına görə, respondentlərin 72 faizi Azərbaycan Prezidenti İlham Əliyevin fəaliyyətini müsbət qiymətləndirərək onun Qərbin və xüsusilə də Böyük Britaniyanın etibarlı müttəfiqi və Avropaya inteqrasiyaya dəstək verən lider olması fikrini ifadə etmişlər.

BMT Təhlükəsizlik Şurasının erməni işğalçı qüvvələrini Azərbaycanın suveren torpaqlarından geri çəkilməyə çağıran 822, 853, 874 və 884 saylı qətnamələri ilə bağlı suala böyük əksəriyyət qətnamələrin icra və tətbiq edilməsinin labüd olması cavabını vermişdir.

Həmin sualı cavablandıran millət vəkillərinin müsbət rəyi mənfi rəydən 18 dəfə çox olub ki, bu da öz növbəsində BMT-yə, Azərbaycanın ərazi bütövlüyünə və məcburi köçkünlərin hüquqlarına olan güclü dəstəyi əks etdirir.

Respondentlərin 94 faizi Transadriatik qaz kəmərinin (TAP) Avropanın enerji təhlükəsizliyini gücləndirəcəyinə əmin olduqlarını bildirmişlər.

“Dods Polling” Britaniya və Avropada sorğu, siyasi informasiya təhlili və ictimai kommunikasiya platformalarının yaradılması və inkişafı üzrə fəaliyyət göstərən ən təcrübəli təşkilatlardandır.