Azərbaycanda səfərdə olan İran İslam Şurası Məclisinin milli təhlükəsizlik və xarici siyasət komissiyasının üzvləri sentyabrın 24-də Milli Məclisin sədri Oqtay Əsədovla görüşmüşlər.

Görüşdə Oqtay Əsədov Azərbaycan-İran münasibətlərindən danışmış, əlaqələrin möhkəmləndirilməsində qarşılıqlı səfərlərin, görüşlərin əhəmiyyətini qeyd etmişdir. Bildirilmişdir ki, ölkələrimizin müxtəlif istiqamətlərdə, o cümlədən siyasi və iqtisadi sahələrdə əməkdaşlığının inkişafı üçün geniş imkanlar vardır. İndiyədək imzalanmış ikitərəfli sənədlər qarşılıqlı münasibətləri daha da inkişaf etdirmək yaxşı hüquqi baza yaratmışdır.

Azərbaycan-İran parlamentlərarası əlaqələrinin razılıq doğurduğunu deyən Milli Məclisin sədri hər iki ölkənin qanunverici orqanlarında fəaliyyət göstərən dostluq qruplarının əməkdaşlığın inkişafında mühüm rolu olduğunu diqqətə çatdırmışdır.

İran İslam Şurası Məclisinin milli təhlükəsizlik və xarici siyasət komissiyasının üzvü Cavad Cahangirzadə ölkəmizə səfərdən məmnunluqlarını bildirmişlər. Qeyd olunmuşdur ki, son zamanlar nümayəndə heyətlərinin səfərlərinin və görüşlərinin intensivləşməsi Azərbaycan ilə İran arasında əməkdaşlığın inkişafına yaxşı töhfə verir.

C.Cahangirzadə, həmçinin İran parlamenti sədrinin salamlarını Oqtay Əsədova çatdırmış və məktubunu ona təqdim etmişdir.

AzərTAc