Azərbaycan Respublikası Prezidenti Administrasiyası rəhbərinin müavini, xarici əlaqələr şöbəsinin müdiri Novruz Məmmədov İstanbula səfəri çərçivəsində sentyabrın 20-də Xəzər Strateji İnstitutunda Türkiyənin aparıcı universitetlərinin rəhbərləri və professorları, “Turkish Policy Quarterly” jurnalının baş redaktoru ilə görüşmüşdür.

Görüşlərdə “Azərbaycanın xarici siyasəti: hazırkı vəziyyət və gələcəyə baxış” mövzusunda müzakirələr aparılmışdır.

Novruz Məmmədov “Kanal 24” televiziya kanalında baş əlaqələndirici Murat Çiçəyin proqramının qonağı olmuş, ölkəmizin xarici siyasəti və son illərdə dinamik sosial-iqtisadi inkişafı ilə bağlı çoxsaylı sualları cavablandırmışdır. Prezident Administrasiyası rəhbərinin müavini, həmçinin Türkiyənin nüfuzlu qəzet və jurnallarının, televiziya kanallarının rəhbərliyi ilə görüşmüşdür. Müzakirələrin əsas mövzusu Azərbaycan-Türkiyə əlaqələri, hər iki ölkənin kütləvi informasiya vasitələrinin əməkdaşlığı, türkiyəli jurnalistlərin Azərbaycanın daxili və xarici siyasəti haqqında məlumatlandırılması olmuşdur.

Görüşlərdə Azərbaycan Respublikası Prezidenti Administrasiyasının siyasi təhlil və informasiya təminatı şöbəsinin müdiri Elnur Aslanov və Azərbaycan Respublikasının Prezidenti yanında Strateji Araşdırmalar Mərkəzinin direktoru Fərhad Məmmədov da iştirak etmişlər.

AzərTAc