Azərbaycan Respublikası Prezidenti Administrasiyasının rəhbərinin müavini və xarici əlaqələr şöbəsinin müdiri Novruz Məmmədov sentyabrın 19-da “Cənubi Qafqazın yüksələn ulduzu: İlham Əliyev dövründə Azərbaycan” kitabının geniştərkibli təqdimat mərasimində iştirak etmək məqsədi ilə Ankarada işgüzar səfərdə olmuşdur.

Azərbaycanın Türkiyədəki səfirliyindən AzərTAc-a bildirmişlər ki, səfər çərçivəsində Novruz Məmmədov qardaş respublikanın xarici işlər naziri Əhməd Davudoğlu, Türkiyə Respublikası Prezidenti Administrasiyasının rəhbəri Mustafa İsen, Böyük Millət Məclisinin sədr müavini Sadık Yakut və hakim Ədalət və İnkişaf Partiyasının xarici əlaqələr üzrə sədr müavini Mövlud Çavuşoğlu ilə görüşlər keçirmişdir.

Görüşlər zamanı qardaş ölkələr arasında olan dostluq münasibətləri, bu münasibətlərin daha da inkişaf etdirilməsi yolları, həyata keçirilmiş strateji layihələrin əhəmiyyəti, bir millətin iki dövlətinin gələcəkdə zəruri olan müştərək fəaliyyətləri və atılması vacib olan addımlar ilə bağlı müzakirələr aparılmışdır.

Novruz Məmmədov görüşlərdə Türkiyədən olan rəsmi şəxslərə “Cənubi Qafqazın yüksələn ulduzu: İlham Əliyev dövründə Azərbaycan” kitabının nüsxələrini hədiyyə etmiş, bu ölkənin nüfuzlu “Hürriyet Daily News” qəzetinə və Anadolu Agentliyinə müsahibələr vermiş, “TRT Haber” televiziya kanalında canlı yayımlanan proqramda iştirak edərək ölkəmizin xarici siyasəti, sosial-iqtisadi inkişafı və Azərbaycanın son illərdəki sürətli inkişafı ilə bağlı suallara aydınlıq gətirmişdir.