“GUAM - Demokratiya və İqtisadi İnkişaf Naminə Təşkilat” Azərbaycanda prezident seçkilərinin qısamüddətli müşahidəsi üçün missiya formalaşdırır. Bu barədə cümə günü Trend-ə GUAM-ın baş katibi Valeri Çeçelaşvili açıqlama vermişdir.

Baş katib bildirib: “Təşkilatımızda belə bir təcrübə yaranıb: ölkələrin dəvəti üzrə GUAM Parlament Assambleyası seçkiləri müşahidə edir. Bu baxımdan Azərbaycandakı prezident seçkiləri də istisna təşkil etmir. Biz oktyabrın 9-da Bakıya gələcəyik”.

V. Çeçelaşvili qeyd etmişdir ki, lakin təşkilat resursları məhdud olduğundan ölkələrdə seçkiqabağı monitorinqlə məşğul olmur. Onun sözlərinə görə, təşkilat seçki günündə seçki prosesinin bilavasitə müşahidə missiyası ilə məşğul olur.

GUAM Parlament Assambleyasının nümayəndə heyəti oktyabrın 7 və ya 8-i Bakıya gələcək, seçki günü monitorinq aparacaq, oktyabrın 10-da, səhər saatlarında mətbuat konfransı keçirəcək. Mətbuat konfransında bilavasitə seçki günü aparılan müşahidə üzrə müvafiq nəticələr təqdim ediləcək.

Hazırda müşahidə missiyasının tərkibi formalaşdırılır. Missiyaya GUAM ölkələrinin parlament nümayəndə heyətlərinin nümayəndələri daxil olacaqlar.

Missiya mümkün qədər çox seçki məntəqəsinə baş çəkmək üçün 2-3 qrupa bölünəcək.

Baş katib demişdir ki, Gürcüstan nümayəndə heyətinə ölkə parlamentinin vitse-spikeri və GUAM PA-nın hazırkı sədri Zurab Abaşidze rəhbərlik edəcək: “Moldova və Ukrayna nümayəndə heyətləri isə hələ formalaşdırılmayıb. Missiya Bakıda fəaliyyət göstərəcək. Regionlara səfərlər də istisna edilmir”.