Türkiyə, Azərbaycan və Gürcüstanın birgə həyata keçirdiyi nəqliyyat və enerji layihələri sayəsində Xəzər regionu dünyada strateji əhəmiyyət kəsb edəcək. “Trend”in “TRT Haber” telekanalına istinadən verdiyi məlumata görə, bunu Türkiyə Prezidenti Abdullah Gül İstanbulda keçirilən nəqliyyat və rabitə üzrə beynəlxalq forumda çıxışı zamanı demişdir.

Prezidentin sözlərinə görə, Bakı-Tbilisi-Qars dəmir yolu layihəsi Pekindən Londonadək vahid nəqliyyat dəhlizinin yaradılmasına imkan verəcək. “Bakı-Tbilisi-Qars” dünyada ticarət balansını dəyişdirməyə hesablanmış “İpək yolu” layihəsinin zənciridir: “Biz Azərbaycan və Gürcüstandan olan həmkarlarımızla birlikdə bu dəmir yolunun tikintisini başa çatdrımaq üçün hər cür səy göstəririk”.

A.Gül qeyd etmişdir ki, “Bakı-Tbilisi-Qars” layihəsi gələn il istismara veriləcək.