“Milli Şura”nın 19 avqust sessiyasında yeni vahid namizədin təyin edilməməsi, daha bir neçə günün itirilməsi təbii ki, uğursuzluqdur. Bu barədə Trend-ə Müsavat Partiyasının İcra Aparatının rəhbəri Arif Hacılı açıqlama vermişdir.

Hacılı qeyd etmişdir ki, əslində yaranmış vəziyyəti “vaxt keçir kimi yox, vaxt artıq keçib” kimi də dəyərləndirmək olar: “Çünki artıq seçki kampaniyasının başlanmasından 11 gün keçib, amma biz hələ də namizəd məsələsi ilə əlaqədar yaranmış böhrandan çıxa bilməmişik. Hesab edirəm ki, bir neçə gün ərzində bu sualların hamısına cavab tapılacaq. Biz Müsavat Partiyası olaraq müxalifətin bu seçkilərdə birgə iştirakına nail olmaq üçün bütün güzəştlərə hazır olmuşuq və indi də hazırıq”.

A.Hacılı bildirmişdir ki, “Milli Şura”nın bu gün düşdüyü böhrandan çıxması üçün bir sıra təklifləri var və bu təkliflər hazırda müzakirə olunur.

Lakin A.Hacılı qeyd etmişdir ki, bu müzakirələrin nəticəsiz başa çatacağı halda Müsavat Partiyası müstəqil hərəkət edəcək: “Təbii ki, biz “Milli Şura”dakı qüvvələri seçkilərdə bu və ya digər şəkildə iştiraka razı sala bilməsək, onda müstəqil qərarlarımızı qəbul etmək üçün müzakirələrə başlamalı olacağıq”.