BMT Baş katibi Pan Gi Mun ilə Misirin vitse-prezidenti Məhəmməd əl-Baradeyi arasında telefon danışığı olmuşdur. APA-nın BMT-nin saytına istinadən verdiyi məlumata görə, BMT Baş katibi ölkədə yaranan vəziyyətlə bağlı ciddi narahatlığını bildirmiş və çoxlu sayda insanların ölümünə səbəb olan iğtişaşları pisləmişdir. O, Misirin müvəqqəti hakimiyyətini partiya mənsubiyyətindən asılı olmayaraq bütün vətəndaşların təhlükəsizliyini təmin etməyə, devrilmiş prezident Məhəmməd Mursini və “Müsəlman Qardaşları” hərəkatının rəhbərliyini azadlığa buraxmağa və ya tez bir zamanda onları şəffaf və ədalətli şəkildə mühakimə etməyə çağırmışdır.

 Baş katib Misirdəki vəziyyəti Türkiyə və Qətərin xarici işlər nazirləri və Ərəb Dövlətləri Liqasının baş katibi ilə də müzakirə etmişdir. Söhbət zamanı BMT baş katibi bu ölkədə yaranan vəziyyətlə bağlı narahatlığını ifadə etmişdir.