Ağcabədi şəhərindəki  mədəniyyət evində Yeni Azərbaycan Partiyası (YAP) rayon təşkilatının fəalları ilə görüş keçirilmişdir.

 AzərTAc xəbər verir ki, YAP sədrinin müavini-icra katibi Əli Əhmədov, Milli Məclisin deputatları Eldar İbrahimov, Tahir Rzayev və rayon rəhbərliyi əvvəlcə ümummilli lider Heydər Əliyevin şəhərin mərkəzi meydanındakı abidəsi önünə gül-çiçək düzmüş, xatirəsini ehtiramla yad etmişlər.

Görüşdə çıxış edən YAP Ağcabədi rayon təşkilatının sədri Rövşən Əhmədov partiya üzvlərinin rayonun ictimai-siyasi, mədəni və sosial-iqtisadi həyatındakı fəal rolundan danışmış, prezident seçkilərinə hazırlıqla əlaqədar görülən işlər barədə məlumat vermişdir. Bildirilmişdir ki, təşkilatın 8905 nəfər üzvündən 3825 nəfərini qadınlar, 3778 nəfərini gənclər təşkil edir.

Təşkilatın qarşıdan gələn prezident seçkilərinə ciddi hazırlaşdığını deyən R.Əhmədov bildirmişdir ki, rayon ərazisindəki 82 və 83 saylı seçki dairələrində 69 seçki məntəqəsi vardır. Seçkiyə hazırlıqla bağlı rayon təşkilatında seçki qərargahı yaradılmış, 71 nəfər məşvərətçi səs hüquqlu partiya fəalı, 345 müşahidəçi və təbliğat-təşviqat aparacaq ziyalılar müəyyənləşdirilmişdir.

Rayon təşkilatının sədri bildirmişdir ki, ağcabədililər xalqımızın ümummilli lider Heydər Əliyev ideyalarının layiqli davamçısı Prezident İlham Əliyevi seçkilərdə alternativsiz namizəd kimi görür və seçkilərdə fəal iştirak edərək prezidentliyi dövründə ölkəmizi böyük inkişaf yoluna çıxarmış Yeni Azərbaycan Partiyasının vahid namizədinə səs verəcəklər.

YAP sədrinin müavini-icra katibi, Milli Məclisin deputatı Əli Əhmədov görüşdə çıxış edərək Prezident İlham Əliyevin rəhbərliyi ilə ötən 10 ildə ölkəmizdə qazanılmış böyük uğurlardan, genişmiqyaslı inkişafdan danışmışdır. Bildirilmişdir ki, bu illər ərzində Azərbaycanda həyat köklü surətdə dəyişmişdir. Ölkədə əmin-amanlıq, sabitlik, dinclik təmin olunmuş, iqtisadiyyatın güclənməsi sayəsində insanların rifah halı yüksəlmişdir.

Azərbaycanın hər yerində modernləşmə strategiyasının uğurla həyata keçirildiyini deyən YAP sədrinin müavini bildirmişdir ki,  paytaxtdan tutmuş bölgələrədək hər bir yaşayış məntəqəsində yeniləşmə siyasəti geniş vüsət almışdır. Prezident İlham Əliyevin həyata keçirdiyi uğurlu siyasət sayəsində bu gün bütün dünyada sürətlə inkişaf edən, iqtisadiyyatı möhkəmlənən, müasirləşən Azərbaycan obrazı formalaşmışdır. Bütün bunları görən Azərbaycan vətəndaşları Prezident İlham Əliyevin ötən 10 illik fəaliyyətinə qiymət verərək və növbəti 5 ildə ölkəmizin daha da inkişaf edəcəyinə inanaraq qarşıdan gələn seçkidə onun namizədliyini birmənalı olaraq dəstəkləyirlər. 

YAP-ın icra katibi qarşıdan gələn prezident seçkilərinə hazırlıqla əlaqədar görüləcək işlərdən bəhs etmiş, partiya fəallarına vəzifələri ilə bağlı müvafiq tövsiyələr vermişdir.

Tədbirdə rayon icra hakimiyyətinin başçısı Şahin Məmmədov və YAP-ın fəalları çıxış edərək Ağcabədi rayonunda gedən sosial-iqtisadi inkişafı, aparılan genişmiqyaslı tikinti-quruculuq işlərini, əhalinin sosial problemlərinin həlli istiqamətində həyata keçirilən tədbirləri dövlətimizin başçısının apardığı uğurlu siyasətin nəticəsi kimi qiymətləndirmişlər. Əminliklə bildirilmişdir ki, ağcabədililər növbəti prezident seçkilərində də yüksək fəallıq göstərərək dövlətimizin başçısı İlham Əliyevə yekdilliklə səs verəcəklər.