Vaşinqtonun Hey Adams otelində ABŞ Dövlət Protokol Xidmətinin rəhbəri səfir Kaprişia Penavik Marşalın (Capricia Penavic Marshall) vəzifə müddətinin bitməsi ilə əlaqədar Azərbaycan səfirliyi tərəfindən rəsmi ziyafət verilmişdir.

Səfirlikdən APA-ya verilən məlumata görə, ziyafətdə diplomatik korpusun nümayəndələri, səfirlər, Dövlət Departamentinin yüksək vəzifəli rəsmiləri, aparıcı analitik mərkəzlərin mütəxəssisləri və konqresmenlər iştirak etmişlər.

Tədbirdə səfir Elin Süleymanov açılış nitqi ilə çıxış edərək, fəaliyyəti dövründə xanım Marşalın əvəzsiz xidmətlərindən bəhs etmiş və bu xüsusda diplomatik missiyalarla ABŞ Administrasiyası arasında qarşılıqlı faydalı münasibətlərin qurulmasına verdiyi töhfəni xüsusi vurğulamışdır. Xanım Marşalı ABŞ-ın görkəmli diplomatı kimi xarakterizə edən səfir E. Süleymanov ona diplomatik korpusa göstərilən diqqət və qayğıya görə təşəkkürünü bildirmişdir.

Daha sonra çıxış edən  səfir K. Marşal məsuliyyətli vəzifəsinin qüsursuz yerinə yetirilməsində əməkdaşlıq edən hər kəsə öz minnətdarlığını ifadə etmişdir. K. Marşal xüsusilə ABŞ və Azərbaycan arasında dost münasibətlərin ruhunun bütün əməkdaşlıq sahələrində əks olunmasından məmnun olduğunu qeyd edərək ABŞ-ın Azərbaycanla münasibətlərinin inkişafına xüsusi önəm verdiyini diqqətə çatdırmışdır.

Sonda xanım Marşala Azərbaycan səfirliyi adından xatirə lövhəsi təqdim edilmişdir.