Prezident Administrasiyasının ictimai-siyasi məsələlər şöbəsinin müdiri Əli Həsənov bildirmişdir ki, Azərbaycan hakimiyyəti Türkiyənin Baş naziri Rəcəb Tayyib Ərdoğanın ABŞ-da keçirəcəyi görüşlərdə Dağlıq Qarabağ probleminin həlli məsələlərinin prioritet mövzu olacağına inanır.
Əli Həsənov demişdir: "Gözləntimiz ondan ibarətdir ki, ABŞ Prezidenti Minsk qrupu həmsədrlərindən biri olan ölkənin başçısıdır və Ermənistanı konstruktiv mövqeyə gətirmək məqsədilə rəsmi Yerevanı Dağlıq Qarabağ məsələsində öz işğalçı mövqeyindən əl çəkməyə məcbur etsin, ona təzyiq göstərsin".
Şöbə müdiri demişdir ki, bölgədə sülhün yaranması ilk növbədə, Ermənistanın işğalçı mövqeyindən əl çəkməsindən asılıdır.
"Düşünürük ki, ABŞ və Türkiyənin orada iştirak edəcək Baş naziri bu məsələni gündəmin birinci məsələsi sırasında qaldıracaq və hansısa bir mexanizmlə Ermənistan prezidentinə təzyiq göstərəcəklər", - deyə Prezident Administrasiyasının şöbə müdiri vurğulamışdır.