Səfir İrfan SİDDİQ: “Azərbaycan böyük strateji əhəmiyyət kəsb edir”

İrfan Siddiq Böyük Britaniyanın Azərbaycanda səfiri təyin olunmuşdur. Bu barədə Trend-ə Böyük Britaniyanın Azərbaycandakı səfirliyindən məlumat vermişlər.

Siddiq avqust ayında fəaliyyətə başlayacaq.

İrfan Siddiq Böyük Britaniyanın diplomatik xidmətində təqaüdçü olan Piter Beytmanı əvəz edəcək.

Siddiq Böyük Britaniyanın Xarici İşlər Ofisində fəaliyyətə 1998-ci ildə başlamışdır. Hindistan, Misir, Amerika Birləşmiş Ştatları, Suriya və İraqda geniş təcrübə qazanmışdır.

Diplomat Azərbaycana səfir təyin olunması münasibətilə demişdir: “Mən Böyük Britaniyanın Azərbaycan Respublikasında səfiri təyin edilməyimdən çox şadam. Azərbaycan cəlbedici ölkədir. Zəngin mədəni irsə, dinamik iqtisadiyyata malik bir ölkədir və böyük strateji əhəmiyyət kəsb edir. Mən Azərbaycanda yaşamaq və işləmək, Azərbaycan və Azərbaycan xalqını tanımaq və Böyük Britaniyanın maraqlarını və dəyərlərini daha yaxşı təbliğ etmək üçün Britaniya-Azərbaycan əlaqələrini inkişaf etdirməyi səbirsizliklə gözləyirəm”.