Tacikistan Prezidenti Emoməli Rəhmon bu ölkədə işgüzar səfərdə olan Azərbaycanın fövqəladə hallar naziri Kəmaləddin Heydərov ilə görüşmüşdür. 

Tacikistan Prezidentinin mətbuat xidmətinin verdiyi məlumata görə, görüşdə ölkələrimiz arasında əlaqələrin indiki vəziyyəti və inkişaf perspektivləri haqqında geniş fikir mübadiləsi aparılmışdır. Həmçinin Azərbaycan-Tacikistan Hökumətlərarası Əməkdaşlıq Komissiyasının işinin gücləndirilməsinin vacibliyinə toxunulmuşdur.

Bundan başqa, görüşdə fövqəladə hallar sahəsində əlaqələrin yaradılması və inkişafı, fövqəladə halların və texnogen qəzaların aradan qaldırılması istiqamətində təcrübə mübadiləsinin aparılması, xilasetmə xidmətlərinin işinin təkmilləşdirilməsi, təbii fəlakətlər zamanı texniki və digər yardımların göstərilməsi, həmçinin bu sahədə yüksək səviyyəli peşəkar kadrların hazırlanması ilə bağlı müzakirələr aparılmışdır. 

Görüşdə Azərbaycanın Tacikistandakı səfiri Abbasəli Həsənov iştirak etmişdir.

Qulu KƏNGƏRLİ,

AzərTAc-ın xüsusi müxbiri

Düşənbə