İyulun 1-də Yeni Azərbaycan Partiyası (YAP) sədrinin müavini-icra katibi, Milli Məclisin deputatı Əli Əhmədovun sədrliyi ilə YAP Nəsimi rayon təşkilatı ərazi ilk təşkilatlarının sədrləri ilə görüş keçirilmişdir.

Görüşdə YAP sədrinin müavini Əli Əhmədov çıxış edərək bu il keçiriləcək prezident seçkilərində Azərbaycan dövlətinin başçısı İlham Əliyevin namizədliyinin irəli sürülməsini cəmiyyətimizin yekdil rəyinin ifadəsi kimi qiymətləndirmişdir. Diqqətə çatdırmışdır ki, hazırkı görüşlərin əsas məqsədi YAP ərazi ilk təşkilatlarının ölkəmizdə qarşıdan gələn prezident seçkilərinə səfərbər olunmasına zəmin yaratmaqdır.

Artıq cəmiyyətimizin aparıcı qüvvəsi olan Yeni Azərbaycan Partiyası üzvlərinin sayı 600 min nəfəri ötüb keçmişdir. YAP üzvləri yeddi mindən çox ilk təşkilatda birləşmişlər. Partiya ölkənin ictimai-siyasi həyatında aparıcı rol oynayır, buna görə də onun sıralarına gənclərin böyük axını müşahidə edilir.

Əli Əhmədov demişdir ki, YAP-ın şaxələnmiş rayon təşkilatları mövcuddur və ümumilikdə seçki hərəkətləri rayon təşkilatları vasitəsilə reallaşır. Prezident İlham Əliyevin rəhbərliyi altında ötən 10 il ərzində görülən işlər cəmiyyət tərəfindən yüksək qiymətləndirilir. Biz həmin dövrlə indiki Azərbaycanı müqayisə etdikdə nə qədər böyük dəyişikliklərin baş verdiyinin şahidi oluruq. Bu müddətdə ölkə iqtisadiyyatı üç dəfə artmış, insanların həyat şəraiti daha da yaxşılaşmış, eləcə də modernləşmə siyasəti həyata keçirilmişdir. Ölkənin hər yerində müasirləşmə hiss olunur, şəhər və kəndlərin siması dəyişir. Təbii ki, baş verən dəyişiklikləri də hər bir Azərbaycan vətəndaşı öz həyat tərzinin gündən-günə yüksəlməsində hiss edir.

Tədbirdə ötən müddətdə görülən işlər və qarşıda duran məsələlər müzakirə edilmişdir. 

AzərTAc