Azərbaycanla vizasız gediş-gəliş rejimi tətbiq edilən ölkələrin siyahısına dəyişiklik edilmişdir.

 APA -nın məlumatına görə, iyunun 14-də edilən dəyişikliyə əsasən, vizasız gediş-gəliş rejimi tətbiq olunan 47 ölkədən 28-də diplomatik və xidməti, 6-da yalnız diplomatik, 8-də diplomatik, rəsmi və xidməti, 4-də diplomatik, xidməti və xüsusi, 1-də isə diplomatik, rəsmi, xidməti və xüsusi pasportların sahibinə vizasız gediş-gəliş hüququ verilir.

Bu ölkələrdən yalnız İran, Pakistan və Vyetnamda vizasız yaşamaq üçün icazə verilən müddət 1 ay, 8 ölkədə 30 gün, 16 ölkədə isə 90 gün təşkil edir.

Azərbaycan Respublikasının ümumvətəndaş pasportuna malik vətəndaşları isə İran (15 gün) və Türkiyə (1 ay) ilə vizasız gediş-gəliş hüququna malikdir.

Qeyd edək ki, Azərbaycanda mövcud viza rejimi “Ölkədən getmək, ölkəyə gəlmək və pasportlar haqqında” Azərbaycan Respublikasının Qanunu ilə tənzimlənir.

Hazırda dövlətlərarası müqavilələrə uyğun olaraq, bir sıra ölkələrlə Azərbaycan Respublikası arasında vətəndaşların ikitərəfli qaydada vizasız gediş-gəliş rejimi tətbiq edilir.