Müasir Azərbaycanın inkişaf strategiyasının əsasını ümummilli lider Heydər Əliyev qoymuşdur.

Bu sözləri Londonda Azərbaycan xalqının Ümummilli Liderinin həyat və fəaliyyətindən bəhs edən “Heydər Əliyev və Azərbaycanın yüksəlişi, enişi və yenidən dirçəlişi” kitabının təqdimat mərasimində iştirak edən Böyük Britaniya Parlamenti İcmalar Palatasının üzvü, Britaniya-Azərbaycan parlamentlərarası dostluq qrupunun sədri Kristofer Pinçer AzərTAc-a müsahibəsində demişdir.

Azərbaycanın gənc ölkə olmağına baxmayaraq sürətli inkişafını yüksək qiymətləndirən K.Pinçer, bunun təməlində ulu öndər Heydər Əliyevin uzaqgörən siyasətinin dayandığını bildirmişdir.

Dahi şəxsiyyət haqqında yazılan kitabın böyük əhəmiyyət kəsb etdiyini vurğulayan parlament nümayəndəsi, dünya siyasətçilərinin Azərbaycanı və onun ümummilli liderini daha dərindən öyrənmələri  baxımından nəşrin əhəmiyyətini diqqətə çatdırmışdır.

Azərbaycanın son illərdəki hərtərəfli inkişafından bəhs edən K.Pinçer, təkcə paytaxt Bakının deyil, Gəncə, Qəbələ və ölkəmizin digər bölgələrinin dünyanın inkişaf etmiş şəhərlərindən geri qalmadığını diqqətə çatdırmışdır.

  Orxan İSMAYILOV,

 AzərTAc-ın xüsusi müxbiri

London