İyunun 20-də Yeni Azərbaycan Partiyasının (YAP) sədr müavini-icra katibi, Milli Məclisin deputatı Əli Əhmədovun sədrliyi ilə YAP Qaradağ rayon təşkilatı ərazi ilk təşkilatlarının sədrləri ilə görüş keçirilmişdir.

AzərTAc xəbər verir ki, görüş iştirakçıları əvvəlcə Lökbatan qəsəbəsindəki ümummilli lider Heydər Əliyevin adını daşıyan parkda ulu öndərin abidəsini ziyarət edərək önünə tər gül-çiçək qoymuş, dahi şəxsiyyətin əziz xatirəsinə hörmət və ehtiramlarını bildirmişlər.

Sonra tədbir rayondakı Heydər Əliyev Mərkəzində davam etdirilmişdir.

Görüşdə çıxış edən YAP sədrinin müavini-icra katibi, Milli Məclisin deputatı Əli Əhmədov bildirmişdir ki, Azərbaycan Prezidenti İlham Əliyevin bu il keçiriləcək prezident seçkilərində namizədliyinin irəli sürülməsi cəmiyyətimizin yekdil rəyinin ifadəsidir. Bu kimi görüşlərin əsas məqsədi ölkəmizdə qarşıdan gələn prezident seçkilərində YAP ərazi ilk təşkilatlarının bu işə səfərbər olunmasına zəmin yaratmaqdır.

Əli Əhmədov demişdir ki, YAP-ın şaxələnmiş rayon təşkilatları mövcuddur və ümumilikdə seçki hərəkətləri rayon təşkilatları vasitəsilə reallaşır. Prezident İlham Əliyevin rəhbərliyi altında ötən 10 il ərzində görülən işlər cəmiyyət tərəfindən yüksək qiymətləndirilir. Biz həmin dövrlə indiki Azərbaycanı müqayisə etdikdə nə qədər böyük dəyişikliklərin baş verdiyinin şahidi oluruq. Bu müddətdə ölkə iqtisadiyyatı üç dəfə artmış, insanların həyat şəraiti yaxşılaşmış, eləcə də modernləşmə siyasəti həyata keçirilmişdir. Ölkənin hər yerində müasirləşmə hiss olunur, şəhər və kəndlərin siması dəyişir. Təbii ki, baş verən dəyişiklikləri də hər bir Azərbaycan vətəndaşı öz həyat tərzinin gündən-günə yüksəlməsində hiss edir.

Tədbirdə ötən müddətdə görülən işlər və qarşıda duran məsələlər müzakirə edilmişdir.